Romelu Lukaku dëshiron të kthehet te Inter, sulmuesi do të vendosë sa më shpejt për të ardhmen, dhe për këtë arsye edhe pse merkato ende nuk është zyrtarisht e hapur, avokati i tij i besuar, Sebastian Ledure, ka fiksuar një takim me drejtuesit interistë për të kuptuar nëse ekzistojnë vërtetë hapësirat për të veshur sërish fanellën zikaltër.
Raundi i parë i një çështjeje që mbetet shumë komplekse mbi të gjitha për arsye ekonomike. Belgu është i gatshëm të reduktojë pagën, aktualisht merr 12 milionë euro neto, plus 3 të tjera në formë bonusesh te Chelsea, mund të zbresë deri në 7-9 milionë euro në sezon, që gjithsesi është përtej tavanit të pagave të vendosur nga Marotta. (Te Inter rinovimet e mëdha, nga Lautaro te Brozovic, kanë një tavan prej 6 milionë eurosh, duke përjashtuar këtu bonuset).
Pengesa mund të tejkalohet duke arritur akordin brenda 30 qershorit. Lukaku ka mbajtur shtëpinë e tij në Milano dhe Italia mbetet në qendër të interesit, aspekt fiskal i rëndësishëm për të ruajtur avantazhet e Dekretit të Rritjes me lehtësira fiskale të cilat i fitoi kur mbërriti te Inter në 2019.
Në këtë mënyrë nëse gjithçka përkufizohet brenda një muaji Suning, do të paguante neto shumën e kërkuar nga belgu, por në llogaritjen bruto, Interi do të paguante pak a shumë aq sa për lojtarët më të mirë që ka aktualisht në organikë.
Gjithsesi pjesa më e vështirë e operacionit mbetet Chelsea. Klubi anglez duhet të tregohet i hapur për një huazim me të drejtë blerjeje dhe ky është hapi i vërtetë që Interi pret nga Lukaku: të detyrojë blutë që të lejojnë largimin e tij. Tratativat me Marina Granovskian janë të vështira, duke qenë se pas shitjes së klubit ajo është e destinuar të largohet, por në të vërtetë duhet kuptuar se çfarë dëshiron të bëjë pronari i ri i Chelseat Boehly.
