Presidentja e Kosovës, Vjosa Osmani, të martën ka marrë një letër nga presidenti i Shteteve të Bashkuara të Amerikës, Donald Trump, përmes së cilës ai e ka falënderuar për përkushtimin dhe miqësinë ndaj Shteteve të Bashkuara, si dhe për lidershipin e guximshëm.
Sipas Presidencës, në letër, presidenti amerikan shkruan se vendimi për të pranuar shtetas nga shtete të tjera tregon gatishmërinë e fortë të Kosovës për të bashkëpunuar me Shtetet e Bashkuara të Amerikës, duke shtuar se lidershipi në këtë çështje tregon fuqinë dhe dhembshurinë e popullit të Kosovës.
“Shtetet e Bashkuara të Amerikës dhe Kosova ndajnë një lidhje të thellë, të bazuar në respektin e ndërsjellë, vlera të përbashkëta demokratike dhe një vizion për një të ardhme paqësore dhe prosperuese. Përkushtimi juaj për forcimin e kësaj lidhjeje nuk ka kaluar pa u vërejtur, dhe jam i bindur se së bashku do të vazhdojmë të avancojmë qëllimet tona të përbashkëta,” ka theksuar presidenti Trump në letrën e tij.
Trump gjithashtu ka falënderuar Osmanin për angazhimin e saj në forcimin e partneritetit me SHBA-të dhe ka shprehur dëshirën për thellimin e bashkëpunimit ndërmjet dy vendeve në vitet që vijnë.
“Ju falënderoj sërish për lidershipin tuaj të guximshëm dhe për faktin që qëndroni si një mike e vërtetë e Shteteve të Bashkuara. Mezi pres të punojmë së bashku me ju në vitet që vijnë”, ka shkruar Trump.
