Autori: ADEA MUSTAFAJ
Është një ndër rrugët më të frekuentuara në kryeqytet.
Mirëpo kjo pjesë në parkun e “Tokbashqes” ka mbetur në errësirë.
Të shqetësuar me këtë situatë po shprehën banorët e kësaj zone.
Sipas Seladin Nezirit, ndriçimi publik mungon që nga stina e pranverës, e hall më të madh ka për fëmijët.
“Në këtë lagje si prioritet duhet me i dhanë Komuna, kush e ka për obligim këtë. Ndriçim nuk ka. Diku ka ndonjë dritë nëpër mahallë, mirëpo në mahallën tonë prej pranverës nuk ka…Ne gjithmonë jemi të rrezikum aty, por fëmijët janë më së shumti të rrezikum. Tash është pushimi, por në shkollë prej pranverës nuk kanë pas ndriçim”, ka thënë Neziri.
E Zeqir Canolli, thotë se mungesa e dritave po ndikon në ndjenjën e sigurisë.
“Dritat s’po punojnë. Edhe në lagjen tonë ‘Dem Ahmeti’, nuk po punojnë dritat…S’është e sigurt. Nuk është e sigurt se terr”, është shprhur Canolli.
Kritika për këtë situatë kanë edhe nga opozita në Komunën e Prishtinës.
Nga Vetëvendosje thonë se është një nevojë emergjente vendosja e ndriçimit publik.
“Parqet duhet të kenë ndriçim patjetër. Dështimi në menaxhimin e ndriçimit publik është kryesisht kompetencë e Komunës, Drejtorisë së Shërbimeve Publike, dhe ne si opozitë u bëjmë thirrje që sa më shpejt ta rregullojnë ndriçimin publik në kryeqytet…Ata e kanë një të mirë që ymytin qytetarëve nuk ua këpusin kurrë, por është emergjente që të ketë ndriqim publik në rrugë, sidomos në parqe për shkak të sigurisë së qytetarëve”, ka thënë Zeka.
Por nga Komuna e Prishtinës bënë të ditur për televizionin se punimet tashmë kanë filluar dhe zgjidhja do të bëhet brenda disa javësh.
“Jemi duke punuar intensivisht me ndriçim publik. Jemi duke bërë shtim të ri të rrjetit dhe ndërrim të trupave ndriçues edhe në lagjen ‘Tokbashqe’, e deri në ‘Sofali’. Po mendoj që për dy-tre javë ditë kanë me u vendos kabllot e reja, rrjeti i ri i shtrimit të ndriçimit publik dhe ndërrimi i trupave ndriçues. Pastaj edhe ndriçimi smart LED po aplikohet tash në Prishtinë”, ka thënë Gashi.
Sipas Komunës, projekti për shtrimin e rrjetit të ri të ndriçimit dhe ndërrimin e trupave ndriçues përfshin rreth 90 përqind të lagjeve në kryeqytet.
