Presidenti i SHBA-së, Donald Trump, ka bwrw tw ditur se ka urdhëruar vendosjen e dy nëndetëseve bërthamore “në rajonet e përshtatshme” si përgjigje ndaj komenteve “shumë provokuese” të ish-presidentit rus, Dmitry Medvedev.
Trump tha se veproi “në rast se këto deklarata të pamenduara dhe nxitëse janë më shumë se thjesht fjalë. Fjalët kanë rëndësi të madhe dhe shpesh mund të çojnë në pasoja të paqëllimshme – shpresoj që ky të mos jetë një nga ato raste”.
Ai nuk bëri të ditur se në cilat zona janë vendosur dy nëndetëset.
Medvedev së fundmi ka kërcënuar SHBA-në si reagim ndaj ultimatumit të Trump drejtuar Moskës për të pranuar një armëpushim në Ukrainë, ndryshe do të përballet me sanksione të ashpra.
SHBA dhe Rusia zotërojnë më shumë armë bërthamore se çdo vend tjetër në botë.
Megjithatë, Trump nuk sqaroi nëse bëhej fjalë për nëndetëse me energji bërthamore apo me armë bërthamore, në postimin e tij në Truth Social.
“Bazuar në deklaratat shumë provokuese të ish-presidentit të Rusisë, Dmitry Medvedev, i cili tani është zëvendëskryetar i Këshillit të Sigurisë së Federatës Ruse, kam urdhëruar që dy nëndetëse bërthamore të pozicionohen në rajonet e duhura”, ka shkruar Trump, raporton BBC.
Së fundmi, Trump dhe Medvedev janë përfshirë në një përplasje personale me akuza të ndërsjella në rrjetet sociale.
Kjo vjen pasi Trump i ka vendosur një afat të ri Putinit për t’i dhënë fund luftës deri më 8 gusht.
Para kësaj, të hënën ai kishte caktuar një afat prej “10 ose 12” ditësh. Më herët gjatë korrikut, ai kishte kërcënuar Rusinë me tarifa të ashpra ndaj naftës dhe eksporteve të tjera nëse lufta nuk përfundon për 50 ditë.
Të hënën, Medvedev – i cili mban postin e zëvendëskryetarit të Këshillit të Sigurisë në Rusi – e akuzoi Trumpin se po “luan lojën e ultimatumeve me Rusinë”.
Në një postim në X, ai tha se “çdo ultimatum i ri është një kërcënim dhe një hap drejt luftës”.
Më herët në korrik, ai e kishte quajtur ultimatumet e Trumpit si “teatrale”, duke shtuar se “Rusia nuk do t’ia dijë”.
Ndërsa të enjten, përmes një postimi në Telegram, Medvedev paralajmëroi për një “kërcënim të dorës së vdekur” – që sipas disa analistëve ushtarakë i referohet sistemit të sulmit të kundërpërgjigjes bërthamore të Rusisë.
E premtja nuk ishte hera e parë që Trump iu përgjigj komenteve të Medvedevit. Të enjten, ai e quajti Medvedevin “ish-presidentin e dështuar të Rusisë, i cili mendon se është ende president”.
Trump gjithashtu e paralajmëroi Medvedevin që të “kujdeset për fjalët e tij”, duke shtuar se “po hyn në territor shumë të rrezikshëm!”
Shtëpia e Bardhë i tha BBC-së të premten se nuk kishin asnjë koment shtesë për deklaratat e Trumpit.
Kremlini nuk ka komentuar publikisht deklaratën më të fundit të Trumpit.
