Punimet në kanalin e Ibër Lepencit po vazhdojnë.
Derdhja e ujit që vije edhe kah kjo pjesë e Zubin Potokut, do të mbulohet e tëra.
Për t’i parë nga afër këto punime, aty këtë të enjte ishte ministrja në detyrë e Ekonomisë, Artane Rizvanolli.
“Investimet që po bëhen janë tejet të rëndësishme sepse rrisin furnizimin me ujë. Po na shpjegonin kryeshefi me kolegët se, për rehabilitim janë përzgjedhur pjesët që kanë qenë më të dëmtuara ku ka pasur rrezik dhe më shumë nevojë. Dhe 20 kilometra të kanalit janë të hapur, gjysma përmes këtij projekti tashmë po mbulohen” , tha Rizvanolli.
Rizvanolli tregoi edhe numrin e banorëve që furnizohen me ujë nga Ibër Lepenci.
“Ky kanal 49 kilometra, është jetik për furnizim me ujë siç e kemi parë sulmin që ka qenë më 29 nëntor, kanali furnizon në njërën anë KEK-un për ftofje të termocentraleve nga ana tjetër përdoret për ujijte uji, mbi 20 hektarë ujiten, pastaj edhe për ujë të pijshëm, për industri e përdorim familjar ku përrreth 500 mijë qytetarë të Kosovës qendrore furnizohen pjesërisht ose plotësisht nga ky kanal” , tha ministrja në detyrë .
E kryeshefi i Iber Lepencit, Faruk Mujka tha se punimet për mbulimin e këtij projekti po bëhen edhe me pajtim të komunitetit serb.
“Kjo është pjesa në Zubin Potok e cila në marrëveshje me komunitetin këtu, do të mbulohet tërësisht në gjatësi prej 400 metra dhe pastaj do të shfrytëzohet nga komuniteti për aktivitete të tyre”, tha ai.
Në paraburgim për sulmin në Ibër Lepenc janë dy vëllezërit Dragisha dhe Jovan Viqentijeviq të cilët dyshohet se më 29 nëntor të vitit 2024 vendosën eksplovizin në kanalin kryesor, duke dëmtuar kështu infrastrukturën kritike të vendit.
