Komandanti i Brigadës së Zjarrfikësve në Prishtinë, Abdusamed Shkodra në emisionin “Ditari” në Tëvë1, ka deklaruar se situata me zjarret në kryeqytet është alarmante, sidomos gjatë muajit korrik, ku janë regjistruar mbi 500 intervenime.
“Në muajin korrik kemi pasur gjithsej 538 intervenime. Krahasuar me të njëjtën periudhë të vitit të kaluar, kemi rritje të numrit të intervenimeve për 34%”, ka deklaruar Shkodra.
Sipas tij, një pjesë e madhe e zjarreve janë shkaktuar nga pakujdesia e qytetarëve, sidomos nga hedhja e cigareve në vende të paautorizuara.
“Temperaturat e larta janë faktor i madh, por nuk mund të anashkalojmë edhe veprimet e pakujdesshme të qytetarëve. Vetëm gjatë këtij vikendi në Prishtinë kemi pasur 99 intervenime, shumica prej tyre për shkak të zjarreve të hapura në natyrë”, ka theksuar ai.
Shkodra tregoi se zjarret shpërthejnë kryesisht gjatë mesditës dhe mungesa e kapaciteteve të mjaftueshme e bën ndërhyrjen më të vështirë.
Ai përmendi rastin e fundit në fshatin Trudë, ku zjarrfikësit kanë punuar për 24 orë rresht për të vënë nën kontroll një zjarr masiv.
“Në fshatin Trudë, nga e shtuna, kemi pasur një zjarr të madh ku ne kemi intervenuar për afër 24 orë dhe më në fund kemi arritur ta shuajmë”, ka shtuar komandanti.
Shkodra nënvizoi gjithashtu se edhe KFOR-i është vënë në dijeni për situatën që po konsiderohet alarmante, ndërsa u bëri thirrje qytetarëve për kujdes maksimal në këtë periudhë të nxehtë.
