Sot, 15 vjet më parë në Hagë të Holandës u vulos pavarësia e Kosovës.
Gjykata Ndërkombëtare e Drejtësisë konfirmoi se shpallja e pavarësisë së shtetit më të ri në Evropë, më 17 shkurt 2008 nuk e ka shkelur të drejtën ndërkombëtare.
Nga 14 gjyqtarë, 10 votuan në favor të këtij vendimi ndërsa 4 prej tyre kundërshtuan.
Ndryshe, ky vendim i dha një goditje të fortë diplomatike Serbisë që e kundërshtonte pavarësinë e Kosovës.
Ish-deputeti i Kuvendit, Xhavit Haliti, thotë se vendimi i GJND-së për pavarësinë e Kosovës është ndër ngjarjet më të rëndësishme historike për vendin.
“Unë konsideroj që pas konferencës së Rambujes dhe shpalljes së pavarësisë, është vendimi më i fuqishëm, i cili ka vulosur në një mënyrë veprimin e Kuvendit të Kosovës që e ka shpallur pavarësinë. Natyrisht që ishte gabim i rëndë nga Serbia që e dërgoi këtë çështje në Gjykatën Ndërkombëtare sepse ia rrëzuan poshtë kërkesën dhe na dhanë të drejtë neve”, ka thënë Haliti
E për avokatin e njohur britanik, Toby Cadman, ky vendim nga GJND-ja ishte një pikë kthese për Kosovën ndërsa për Serbinë nënkuponte disfatë të rëndë.
“Vendimi në fjalë kishte një rëndësi të jashtëzakonshme dhe domethënie të thellë për Kosovën si një shtet i sapo shpallur i pavarur. Për një vend që po dilte nga vite të tëra shtypjeje sistematike, diskriminimi dhe dhune nga autoritetet serbe, njohja ndërkombëtare nuk ishte thjesht simbolike – ishte thelbësore për mbijetesë dhe dinjitet. Vendimi ishte një pikë kthese për Kosovën, që përfaqësonte një rrugë drejt legjitimitetit dhe vetëvendosjes, ndërsa për Serbinë përbënte një sfidë ndaj narrativës kombëtare dhe interesave politike, duke nxitur kundërshtim të vazhdueshëm dhe përpjekje për të zbehur ose anuluar efektet e tij”, ka thënë Cadman.
Deklarata e Gjykatës Ndërkombëtare të Drejtësisë u dha pas një ankese që Serbia kishte dërguar në këtë organ të drejtësisë, kundër shpalljes së pavarësisë së Kosovës.
