Më 12 tetor është data kur është caktuar mbajtja e zgjedhjeve lokale.
E deri tani, kësaj gare ia kanë mësyrë vetëm pesë gra.
Dy prej kandidateve janë nga Partia Socialdemokrate, Besa Shahini në garë për kryeqytetin e Natyra Kuçi për komunën e Deçanit.
Përveç tyre, tri kandidate i ka edhe Aleanca për Ardhmërinë e Kosovës.
Nga ky subjekt, Xhemile Murati e synon Ferizajn, Vildane Latifi Fushë-Kosovën dhe Hafize Sallahu Kaçanikun.
Nga Lidhja Demokratike e Kosovës nuk kanë asnjë kandidate grua në listën e kandidatëve për kryetarë.
Në 38 komuna, LDK-ja përfaqësohet vetëm nga burrat.
As Lëvizja Vetëvendosje dhe as Partia Demokratike e Kosovës, deri tash nuk e kanë shpallur asnjë kandidaturë të grave.
Me një praktikë të tillë nuk befasohet profesori universitar, Avdi Smajljaj.
Ai thotë se gratë shfrytëzohen vetëm kur vjen puna për kuotën gjinore.
“Mendoj që kjo reflekton një shkallë të konsiderueshme të patriarkalizmit në organizimin e partive politike, si duket vetëm aty ku janë të detyruar siç është rasti i kuotës për Kuvend dhe për asamble ofrojnë emra sepse janë të obliguar me ligj dhe unë e kam thënë edhe më herët që ky ligj dhe këto rregulla janë bërë më shumë si kërkesë e ndërkombëtarëve sesa vërtetë që kanë reflektuar në vullnetin e partive politike sepse të ishte kështu do të kishim edhe më shumë kandidate për kryetare të komunave dhe besoj shumë që posti i kryetarit të komunës është një post bukur i fuqishëm me ekzekutiv që kërkon një shkallë të lartë të menaxhimit dhe vendimmarrjes dhe partitë politike e shohin më lehtë që të funksionojnë me meshkuj”, shprehet ai.
Që kjo praktikë është e përsëritur, e thotë edhe aktivistja për të drejtat e grave, Adelina Tërshani.
Ajo vlerëson se partitë ende janë patriarkale përbrenda që nuk ua besojnë këtë post grave.
Numri i votuesve të rinj që do të votojnë për herë të parë në zgjedhjet lokale të 12 tetorit është 33,540 votues.
