Një aksion i gjerë hetimor është duke u zhvilluar në Kosovë lidhur me dyshimet për veprën penale të spiunazhit. Operacioni po udhëhiqet nga Prokuroria Speciale e Kosovës, në bashkëpunim me Inspektoratin Policor të Kosovës (IPK) dhe Agjencinë e Kosovës për Inteligjencë (AKI).
Burime të televizionit Tëvë1 mësojnë se në mesin e të dyshuarve janë edhe zyrtarë policorë, të cilët dyshohet se janë përfshirë në veprime që mund të lidhen me rrjedhje të informacionit të ndjeshëm.
Sipas burimeve nga terreni, aksioni po zhvillohet edhe në rajonin e Anamoravës, ndërsa pritet që gjatë operacionit të arrestohen disa zyrtarë të Policisë së Kosovës.
Lajmin e ka bërë të ditur Prokuroria Speciale, mirëpo nuk ka dhënë ende detaje shtesë, për shkak të ndjeshmërisë së hetimeve, por ka paralajmëruar se informacione të tjera do të publikohen pas përfundimit të operacionit.
Ky rast konsiderohet një ndër më seriozët në vitet e fundit në fushën e sigurisë dhe mbrojtjes së të dhënave shtetërore.
