Një zyrtar i gjendjes civile është arrestuar sot në Prishtinë nga Policia e Kosovës, nën dyshimet për marrje ryshfeti.
Sipas njoftimit zyrtar të Policisë, i dyshuari kishte kërkuar dhe pranuar para në këmbim të një shërbimi zyrtar. Ai u arrestua në flagrancë, në momentin e pranimit të shumës së dyshuar si ryshfet.
“Arrestimi është bërë në kohën kur i dyshuari pranoi paratë në cilësinë e ryshfetit, ndërsa gjatë kontrollit tek ai janë gjetur dhe sekuestruar prova materiale relevante për rastin,” thuhet në njoftimin e policisë.
I dyshuari është intervistuar në prani të avokatit mbrojtës dhe me urdhër të Prokurorit të Shtetit është ndaluar për 48 orë.
Rasti është cilësuar si vepër penale “Marrje e ryshfetit”, bazuar në dispozitat e Kodit Penal të Republikës së Kosovës. Ndërkohë, hetimet lidhur me këtë rast janë duke vazhduar.
