Dështuan edhe në përpjekjen e 46-të.
E menjëherë pas daljes nga salla, deputetët u ndalën para gazetarëve
Edhe të dielën, subjektet politike akuzuan njëra-tjetrën për mos konstituimin e Kuvendit të Kosovës
“Zotit Kurti nuk i bëhet fare vonë, sepse sikur t’i bëhej vonë do të kishte përpjekje serioze për të ndërtuar institucionet e Republikës së Kosovës. Bota po ndryshon shumë e ne mbledhemi këtu për të 46-ën herë për shkak të kryeneçësisë dhe kokforcisë së Albin Kurtit”, tha deputetja nga PDK-ja, Vlora Çitaku
Të gatshëm për një marrëveshje politike, po shprehen nga Nisma Socialdemokrate.
Madje për këtë, deputetja nga ky subjekt, paralajmëroi një takim për ditët në vijim.
“Qëndrimi i Limajt për të takuar Kurtin, ka vetëm një qëllim dhe qëllimi është për t’i dhënë zgjidhje krijimit të institucioneve në Kosovë. Gjatë takimit edhe Limaj e Kurti do të japin qëndrimet e tyre”, tha deputetja nga Nisma, Arbëreshë Krasniqi.
E nga Vetëvendosje, thonë se hapi fillestar për daljen nga ngërçi, është pjesëmarrja e partive të tjera në votim të fshehtë.
“Deputetët e partive politike që në vazhdimësi në çdo seancë po bëjnë shkelje kushtetuese duke mos marrë pjesë në procesin e votimit duhet të bëjnë një hap fillestarë që është marrja pjesë në proces të votimit që të kemi kryetarin e kuvendit e kryesinë”, tha deputeti i VV-së, Faton Peci.
Deputetët komentuan edhe deklaratën e fundit të presidentes Vjosa Osmani.
Në ShBA, Osmani tha se ka informacione se Trump parandaloi një përshkallëzim të situatës në Kosovë nga Serbia.
“Absolutisht nuk kam ndonjë informatë, por janë të pritshme të gjitha veprimet të cilat ne pareshtur i kemi pa nga shteti serb dhe kjo nuk është asgjë e re”, tha deputetja nga PDK, Blerta Deliu-Kodra.
“Nuk i kam pasur ato informata të cilat Trump po thekson se i ka pas”, deklaroi ministri në detyrë për Komunitete dhe Kthim, Nenad Rashiq.
Deputetët do të kthehen sërish në Kuvend të martën.
