Ekipet emergjente u mobilizuan të hënën në Istog. Kjo meqë tokat e kësaj komunë, të hënën u shndërruan në vatra të zjarrit. Kjo gjendje, shkaktoi panik tek banorët.
Për këtë, në terren doli edhe vet i pari i kësaj komune, Ilir Ferati.
Ky i fundit për Tëvë1, thotë se zjarri rrezikoi edhe vendbanimet.
“Ka pasur rrezik edhe në afërsi të vendbanimeve në fshatin Kovragë, ka pasur shtëpi të djegura, pra të pabanuara fatmirësisht. Mirëpo falë kapaciteteve të vogla që i kemi dhe i kemi aktivizuar në tërësi, kemi arritur me përmbyll këtë pjesë të ditës pa dëme në njerëz”, ka thënë Ferati.
Ferati thotë se për shuarjen e zjarrit u angazhuan edhe ekipet e KFOR-it.
“E kemi lajmëruar AME-në përmes zyrtarëve për emergjencë dhe kemi kërkuar asitencë tek komunat fqinje, por edhe ato gjatë ditës janë përballur me probleme të njëjta. Nga FSK-ja ka pasur ekipe të vëzhgimit, kaq. Ndërsa KFOR ka asistuar me cisterna me ujë dhe kompanitë private na kanë asistuar, që i falënderoj publikisht”, ka thënë tutje Ferati.
Me një situatë të ngjashme, po përballet edhe Komuna e Podujevës.
I pari i saj, tha se reagimi i shpejt, bëri që të evitohet një dëm më i madh.
“Djegia e hamulloreve gjatë kësaj periudhe të verës është një praktikë shumë e dëmshme. Përveç rrezikut të përhapjes së zjarrit dhe dëmtimit të pronës, kjo sjellje shkatërron gjallesat që jetojnë në këto hapësira dhe dëmton rëndë pjellorinë e tokës. Bëj thirrje që kjo praktikë e rrezikshme të ndalet menjëherë, pasi përbën kërcënim serioz për jetën, pronën dhe mjedisin. Në këto ditë me temperatura të larta, kërkoj nga qytetarët vigjilencë dhe kujdes të shtuar, duke vepruar me përgjegjësi të plotë ndaj mjedisit, pronave dhe sigurisë së përbashkët”, ka thënë Bulliqi.
Thirrje për kujdes të shtuar, kanë bërë edhe nga Agjencia e Menaxhimit Emergjent.
Nga AME-së, kanë thënë se kanë kapacitet e duhura për t’u përballur me këto zjarre.
“Kosova ka kapacitet të mjaftueshëm sepse janë njësitë profesionale të zjarrfikësve dhe me shoqata vullnetare nëse është e nevojshme. Mirëpo, si shtet kemi kapacitetet nëse ngritët nevoja për të kërkuar edhe angazhimin e njësive tjera qofshin ato të policisë apo ushtrisë, por edhe të emergjencave tjera në nivelin lokal apo qendror”, ka thënë drejtori ekzekutiv Genc Metaj.
Apel për kujdes nga zjarret ditë më parë, ka bërë edhe Policia e Kosovës.
Këta të fundit kanë thënë se personat që kryejnë zjarrëvenie të qëllimshme apo nga neglizhenca, do të përballen me masa ligjore.
