Prokuroria Themelore në Ferizaj ka ngritur aktakuzë ndaj dy personave me inicialet E.S. dhe V.H., për veprën penale “Trafikimi me njerëz”, ndërsa ndaj V.H. edhe për veprën “Frikësimi gjatë procedurës penale”. Sipas Prokurorisë, të pandehurit dyshohen se nga gushti i vitit 2024 deri në mars të vitit 2025, në zonën e Ferizajt, kanë trafikuar vajza të mitura për qëllime seksuale, duke përfituar në mënyrë të kundërligjshme para nga 50 deri në 400 euro për secilin klient.
E pandehura V.H. dyshohet se i ka ftuar vajzat në banesën e saj me premtimin për strehim të përkohshëm, ndërsa më pas në bashkëpunim me E.S., përmes kanosjes dhe përdorimit të forcës, i kanë detyruar të kryejnë shërbime seksuale për klientë të ndryshëm. Paratë e përfituara dyshohet se janë ndarë ndërmjet tyre.
Në një rast konkret më 16 mars 2025, një e mitur ka arritur të dërgojë një audio-mesazh për të dashurin e saj, përmes së cilit ka kërkuar ndihmë. Pas ndërhyrjes së Policisë, të dyshuarit janë arrestuar, ndërsa viktima ka kërkuar trajtim mjekësor për shkak të gjendjes së rënduar psikologjike.
Po ashtu, gjatë kohës kur ndodhej në arrest shtëpiak, e pandehura V.H. ka kontaktuar familjarët e viktimave përmes rrjetit social “Snapchat”, duke tentuar t’i frikësojë dhe t’i bindë të ndryshojnë deklaratat e tyre, madje duke ofruar edhe dhurata si një veturë “Golf 7”. Këto veprime kanë shkaktuar frikë dhe pasiguri te viktimat dhe familjarët e tyre.
Prokuroria ka kërkuar nga Gjykata që të pandehurit të shpallen fajtorë dhe të dënohen sipas ligjit në fuqi.
