Ministri i Jashtëm i Turqisë, Hakan Fidan, paralajmëroi se lufta e Izraelit në Gaza ka shkatërruar dekada të tëra progresi në rajon dhe mund të sjellë pasoja në shkallë globale nëse agresioni nuk ndalet, sipas burimeve diplomatike turke.
“Po nuk u frenua agresioni dhe ekspansionizmi i Izraelit, pasojat do të ndihen në të gjithë botën,” deklaroi Fidan të dielën gjatë një sesioni në kuadër të samitit të 17-të të liderëve të BRICS në Rio de Janeiro, të mbajtur nën organizimin e Brazilit.
Gjatë një paneli të titulluar “Forcimi i Multilateralizmit, Çështjet Ekonomike-Financiare dhe Inteligjenca Artificiale”, Fidan theksoi se veprimet e Izraelit kanë vënë në krizë institucionet ndërkombëtare që janë përgjegjëse për ruajtjen e paqes dhe sigurisë globale.
“Tragjedia e popullit palestinez ndodhet tashmë në qendër të diskutimeve për multilateralizmin,” u shpreh ai. “Kjo situatë përbën një sfidë serioze për legjitimitetin e institucioneve përgjegjëse për ruajtjen e paqes dhe sigurisë ndërkombëtare.”
Ministri tha se Turqia po rrit përpjekjet për të nxitur zgjidhje paqësore dhe për të ulur tensionet në rajon, duke shprehur gatishmërinë për të mbështetur një paqe të qëndrueshme, shkruan Anadoly.
Ai shtoi gjithashtu se globalizimi ka krijuar varësi të ndërsjella që kanë dobësuar zinxhirët e vlerës, veçanërisht në sektorët e energjisë dhe mineraleve kritike, çka thekson nevojën për rritje të qëndrueshme ekonomike, punësim dhe tregti të lirë.
“Ndërsa bota po kalon drejt një sistemi multipolar, qeverisja globale e inteligjencës artificiale po shndërrohet në një përparësi urgjente,” tha Fidan.
“Duhet të merren masat e nevojshme paraprake për të parandaluar që inteligjenca artificiale të shndërrohet në një mjet të ri dominimi.”
