Deputeti i AAK-së, Bekë Berisha, ka kërkuar nga deputetët e partive të ndryshojnë mendimin sa i përket votimit për Albulena Haxhiun për pozitën e kryeparlamentares.
Ai deklaroi se është mirë të gjendet një formë për ta hequr Albin Kurtin nga pushteti.
“Ja kisha dhënë këtij këtë fitore që është duke e lypë. Le ta bon Kuvendin, le ta qet Albulenën se as këta tjerët nuk janë më të mirë se ajo, me ia votuar qeverinë dhe le të merr fitoren, betejën e Kosovës le ta fiton, le të thotë që ka fituar që t’ia shkurtojmë Kosovës vuajtjet me këtë lloj të njerëzve që janë ardh në pushteti. Rrezikojmë të humbim shtetin me ta, nuk merr vesh kurrkush. Nisjani të mendojmë jashtë kësaj që kemi parë deri sot, kështu nuk e di kur dalim, nëse doni vazhdojmë se na jemi trima, është mirë me gjet formën tjetër qysh me e heq këtë njeri”, u shpreh Berisha.
Këtë deklaratë të Berishës, e ka përshëndetur, Deputeti i Lëvizjes Vetëvendosje, Faton Peci.
“Është një qëndrim që duhet vlerësuar. Kjo do të duhej të ishte sjellja e shumicës së deputetëve, pasi vullneti i qytetarëve nuk mund të tjetërsohet. Vetëvendosja ka fituar të drejtën për të propozuar kryetarin e Kuvendit, siç e ka konfirmuar edhe Gjykata Kushtetuese”, u shpreh Peci.
