Edhe pas 16 orëve, tymi ishte prezent.
Ekipet e zjarrfikësve ishin ende në vendin e ngjarjes.
Si shkak i zjarrit një natë më parë, kjo depo në Zonën Industriale në Prishtinë u bë shkrumb e hi.
Sipas zëvendës-komandantit të zjarrfikësve në Prishtinë, Abdusamet Shkodra, zjarri është lokalizuar dy orë më vonë dhe janë mbrojtur objektet për rreth.
“Aty menjëherë është hetu se depoja ka qenë e përfshime nga flakët, ekipet menjëherë kanë reaguar, kanë mbajtë objektin nën kontroll diku rreth orës 22 e 20 minuta është bë lokalizimi i zjarrit që ne nënkuptojmë që është futë në kontroll dhe janë mbrojtur objektet që kanë qenë për rreth. Ku në anën e djathtë ka qenë një objekt i madh i operatorit IPKO, të cilin e kanë konsideruar si objekt të administratës dhe në anën e majtë janë mbrojtur disa objekte të Postës së Kosovës”, tha Shkodra.
Shkodra thotë se kanë kërkuar ndihmë edhe nga ekipet e tjera për intervenim.
“Në ndihmë kemi thirrur edhe në stacionin e zjarrfikësve që është në Kodrën e Trimave, kemi kërku edhe nga stacioni i cili është në kuadër të brigatës i cili është i vendosur në Llabnasellë dhe është dashur të mobilizojmë staf të zjarrfikësve të cilët kanë qenë jashtë orarit”, tha ai.
Që zjarrfikësit kanë reaguar shpejtë thonë edhe nga kompania që iu është djegur depoja.
Derisa thanë se zjarri që shpërtheu nuk ka pasur ndikim në shërbime apo te klientët.
“Për të shuar zjarrin në depon tonë të enjten në mbrëmje, këta heronj punuan pa u lodhur, gjatë gjithë natës dhe deri në mëngjes herët, për të kontrolluar flakët dhe për të mundësuar sigurinë e të gjithë të përfshirëve. Falë reagimit të tyre të shpejtë, guximit dhe profesionalizmit, situata tani është plotësisht nën kontroll. Nuk pati të lënduar dhe shërbimet tona vazhdojnë të funksionojnë pa ndërprerje. Dëshirojmë t’i sigurojmë klientët, partnerët dhe opinionin publik se shërbimet dhe infrastruktura nuk janë prekur”, deklaruan nga IPKO.
Televizioni ka kërkuar një qëndrim edhe nga drejtori i emergjencave në Komunën e Prishtinës, Lulzim Fushtica rreth kësaj ngjarje mirëpo i njëjti nuk ka qenë i qasshëm.
