Më 17 dhjetor të vitit 2024, foli nga Haga.
Këtu ish-presidenti i Kosovës, Hashim Thaçi, tha se nuk është pjesë e garës politike në Kosovë.
Këtë deklaratë, Thaçi, e bëri dy muaj para zgjedhjeve të 9 shkurtit në Kosovë.
“Unë dua ta sqaroj edhe njëherë se unë nuk jam pjesë e garës politike dhe as nuk kam ndonjë ambicie politike as për president, as për kryeministër, as për deputet e as për ndonjë ambicie tjetër për ndonjë pozitë tjetër publike”, pati deklaruar Thaçi.
Por, ish-rivali i tij politik, Albin Kurti, po mendon ndryshe.
Të mërkurën në “Këndin e Debatit” në Tëvë1, kryeministri në detyrë tha se PDK-së, instruksionet politikë i vijnë pikërisht nga qelitë e Hagës.
“PDK nuk është parti, është një shoqëri aksionare me papërgjegjësi të pakufizuara. Aty nuk merresh vesh pse ke fol me një person, prandaj edhe Enver Hoxhaj thotë krejt diçka tjetër. Janë edhe dy ish-kryetarët në Hagë të cilët duhet t’i vizitojnë shpesh për instruksione politike”, deklaroi Kurti.
E vetëm një ditë më pas, Kurtit i është kundërpërgjigjur kreu i PDK-së, Memli Krasniqi.
Ky i fundit tha se Kurti po i shërben Prokurorisë së Hagës.
“Me këtë deklaratë ai po vazhdon me qenë argat i prokurorisë, sepse deklarata të tilla janë deklarata që e dëmtojnë drejtpërdrejt pozicionin e tyre. S’është befasuese as diçka e re, sepse kompleksi i Kurtit në raport me UÇK është diçka që e ka definuar gjatë gjithë jetës së tij. Përndryshe si mund ta arsyetoni që kurrë në jetë s’ka shkuar as me i vizituar atje. Ndoshta Kurti po ashtu tmerrohet nga fakti që ne shumë shpejt presim që t’i kemi në mesin tonë çlirimtarët”, deklaroi Krasniqi.
Se fjalët e Kurtit mund të përdoren nga Prokuroria e Hagës, e thonë edhe njohësit e ligjit në vend.
“Natyrisht që kemi pasur raste në të kaluarën që Prokuroria ka përdorur deklarata edhe të personave më shumë më pak ndikim në shoqëri sesa deklaratat e kryeministrit të vendit, prandaj të pamatura, të pavenda, të paqëndrueshme dhe për më tepër lehtësisht mund të përdoren nga prokuroria si argumente në drejtim të arsyetimit të kërkesave të tyre për vazhdimin e masës së paraburgimit”, tregoi avokati Ardian Bajraktari.
Kurtit të enjten i kanë reaguar edhe nga Organizata e Veteranëve të Luftës.
OVL-UÇK, deklarimin publik të kryeministrit, e kanë cilësuar si të papërgjegjshëm dhe politikisht të rrezikshëm.
