Gjykimi për sulmin ndaj ndërtesës së Komisionit Komunal Zgjedhor në Mitrovicë të Veriut, ka ardhur drejt fundit.
Për këtë sulm të ndodhur në dhjetor të vitit 2022, ku janë katër të akuzuar, Millun Milenkoviq, Dejan Pantiq, Aleksandër Vlajiq dhe Miomir Vakiq, të mërkurën filluan fjalët përfundimtare të palëve.
Prokuroria Speciale që këtë katërshe e ngarkon me vepra penale të terrorizmit, u deklarua se në gjykim janë vërtetuar veprimet e të akuzuarve.
Në bashkërendim, prokurorja Fikrije Fejzullahu tha se ata frikësuan popullatën dhe shkatërruan zyret e Komisioneve Komunale Zgjedhore, në mënyrë që të pamundësojnë zgjedhjet lokale.
“Secila nga provat e administruara përgjatë gjykimit, të ndërlidhura me njëra tjetrën në mënyrë të logjikshme dhe racionale, përtej çdo dyshimi të bazuar kanë vërtetuar faktin që të akuzuarit me dashje direkte, e kanë kryer veprën penale sipas aktakuzës”, ka thënë Fejzullahu.
Prokurorja Fejzullahu prezantoi edhe disa prej provave, të cilat sipas saj i përfshijnë drejtpërdrejt të akuzuarit në kryerjen e veprës penale.
Vet i akuzuari, Millun Milenkoviq para trupit gjykues tha se nuk e pranon fajësinë.
I njohuri si “Llune”, kërkoi gjykim të drejtë.
“Unë nuk jam kurfarë krimineli, ashtu siç më kanë përshkruar. Jeta ime mund të përshkruhet me këto fjalë; njeri shtëpiak, baba i dy fëmijëve, sportiest dhe një njeri që merret me punë të mira për ta mbajtur familjen. Unë pa pikë turpi, ju shikoj në sy, pavarësisht se çfarë ndodhi kohëve të fundit. Nuk e konsideroj veten fajtor dhe ju lutem, që të gjykoni sipas drejtësisë dhe të mos dënoni askënd pa prova”, ka thënë Milenkoviq.
E avokati i tij, deklarori se e gjithë aktakuza e Prokurorisë është e bazuar në supozime.
“Me asnjë deklaratë të dëshmitarëve e asnjë provë materiale, nuk është mundur të vërtetohet as hedhja e granatave e as shpërthimi i tyre. E gjithë aktakuza është bazuar në supozime. Prokuroria Speciale përgjatë këtij gjykimi nuk ka arritur të vërtetoj asnjë element të bashkëkryerjes”, ka thënë avokati i Milenkoviq.
Ekipet mbrojtëse të të akuzuarve të tjerë, do të japin fjalët e tyre përfundimtare në fund të këtij muaji, ku pritet të shpallet edhe aktgjykimi në këtë rast.
