Policia e Kosovës ka arrestuar dhe ndaluar për 48 orë një person të dyshuar për veprën penale “marrja e ryshfetit”, pas një hetimi të zhvilluar nga Drejtoria për Hetimin e Krimeve Ekonomike dhe Korrupsionit (DHKEK) në Gjakovë.
Sipas Policisë, hetimi nisi pas informacioneve të pranuara përmes rrugëve operative, sipas të cilave i dyshuari, shtetas kosovar, në periudha dhe lokacione të ndryshme në zonën e Rahovecit, dyshohet se kishte kërkuar dhe pranuar ryshfet nga pronarë të bizneseve.
Ryshfeti dyshohet se ishte kërkuar në këmbim të moskryerjes së kontrolleve ose mosndëshkimit për shkelje të pretenduara sipas ligjeve në fuqi.
Policia, në bashkëpunim me njësitë tjera dhe në koordinim me Prokurorinë Themelore në Gjakovë, ndërmori veprime hetimore, gjatë të cilave, sipas autoriteteve, u siguruan dëshmi se i dyshuari kishte pranuar shuma të ndryshme parash.
Bëhet fjalë për shuma prej 300 deri në 500 euro, të cilat dyshohet se janë dhënë në disa raste të ndara nga pronarë të ndryshëm biznesesh.
“Me të gjitha veprimet e kryera, personi i dyshuar ka konsumuar veprën penale ‘marrja e ryshfetit’ neni 421 i KPRK-së”, ka bërë të ditur Policia.
Të enjten, me urdhër të Gjykatës Themelore në Gjakovë dhe në koordinim me prokurorin përgjegjës, janë kontrolluar ambienti i punës dhe automjetet që i dyshuari i kishte në shfrytëzim.
Pas intervistimit, me aktvendim të prokurorit, i dyshuari është ndaluar për 48 orë.
Gjatë veprimeve policore, është sekuestruar edhe një telefon celular, i cili do të trajtohet si provë në kuadër të hetimit./teve1.info/
