Komandanti i Forcës së Sigurisë së Kosovës, gjenerallejtënant Bashkim Jashari, ka pritur në takim një delegacion të Gardës Kombëtare të Ajovës, të kryesuar nga shefi i shtabit të Gardës Ajrore të Ajovës, gjeneral brigade Justin T. Wagner.
Sipas FSK-së, gjatë takimit është diskutuar për zhvillimin dhe avancimin e mëtejshëm të FSK-së, si dhe për bashkëpunimin e ngushtë ndërmjet dy forcave.
Palët kanë vlerësuar rëndësinë e partneritetit dhe bashkëpunimit të vazhdueshëm, veçanërisht në fushat me interes të përbashkët, duke shprehur përkushtimin për thellimin e mëtejshëm të këtij partneriteti.
FSK-ja ka theksuar se ky bashkëpunim kontribuon në zhvillimin profesional dhe institucional të Forcës së Sigurisë së Kosovës, si dhe në forcimin e marrëdhënieve të partneritetit ndërmjet Kosovës dhe Shteteve të Bashkuara të Amerikës.
Ndërkohë, gjatë kësaj jave, në FSK po qëndron një delegacion i gjerë ekspertësh nga njësi të ndryshme të Gardës Kombëtare të Ajovës.
“Ekspertët janë angazhuar në fusha dhe aktivitete të ndryshme, në kuadër të bashkëpunimit dhe shkëmbimit të përvojave ndërmjet FSK-së dhe Gardës Kombëtare të Ajovës”, theksohet në fund të njoftimit./teve1.info/
