Presidenca e Kosovës, i bëri bashkë edhe një herë në Prishtinë.
Janë këta ish-delegatët e Kuvendit të Kosovës.
Por, 35 vjet më parë, u bashkuan në rrethana krejt të tjera.
Secili prej tyre i doli kundër suprimimit të antonimisë së Kosovës dhe trajtimit të pabarabartë të shqiptarëve nën regjimin serb.
Kjo i shtyri që me 2 korrik të vitit 1990 të miratojnë Deklaratën Kushtetuese.
Por, kush do ta lexonte publikisht aktin i cili do ta shpallte Kosovën si njësi të veçantë në kuadër të federatës së atëhershme jugosllave?
Nga 114 delegatët, u vendos që këtë ta bënte Muharrem Shabani nga Vushtrria.
“Paraprakisht një grup i delegatëve e mbajtëm një mbledhje për me caktua skenarin e mbledhjes, u propozova dhe u vendos që unë ta lexoj dhe pastaj propozimet e tjera që nëse unë bie, pra vritem, ta lexojnë edhe kolegët e tjerë. Atë ditë erdhëm tek ndërtesa e Kuvendit dhe nuk kishim pritur që ajo t’i ketë dyert e mbyllura nga brenda e jashtë, me pjesëtarë të milicisë serbe dhe shërbimeve sekrete serbe. 2:13 U pajshin snajperat nga tani ku është ndërtesa e qeverisë dhe të tjerat përreth”, ka thënë Shabani, ish delegat i Kuvendit të Kosovës.
Deklaratën që lexoi Shabani, u votua unanimisht nga 114 delegatë të tjerë.
Ndërsa 35 vjet pas kësaj ngjarje, Shabani zbulon se kush ishin të parët që e uruan.
“E mora një telegram prej senatorëve dhe kongresmeneve amerikanë, ishin 9 apo 11-të, të cilët na përgëzuan për këtë akt të drejtë që e kemi shprehur vullnetin e popullit të Kosovës. Duhet të them që këtu pati rol të madh edhe lobi shqiptaro-amerikan atje”, tha tutje Shabani.
Krejt këtë ngjarje nga afër, e përcolli ish-gazetari i Televizionit të Prishtinës, Nuhi Bytyqi.
Pas miratimit të Deklaratës Kushtetuese, Bytyqi vendosi ta marrë mendimin e qytetarëve.
Por një gjë e tillë, e pengoi policinë serbe.
“Pikërisht në këtë vend e ndala një kalimtar të rastit, të cilën unë nuk e njihja, ishte Hamëz Gashi nga Qabiqi i Klinës dhe e pyeta se si e pritët Deklaratën Kushtetuese të Kuvendit të Kosovës. Në atë moment ndërhyri një komandant i policisë serbe që ta ndërprenë intervistën unë insistova që të vazhdojë intervista”, ka thënë Bytyqi.
Bytyqi thotë se atë ditë situata në Prishtinë ishte e tensionuar.
“Ky ka qenë një komandant, Marko i thoshin, i cili ka ardhur me 2 korrik special nga Beogradi dhe i njëjti komandant me 5 korrik kur është mbyll programi në gjuhën shqipe në RTP, ka ardhur në zyrën time ku kam qenë në punë si redaktor dhe më ka penguar në kryerjen e punës sime si redaktor në RTP”, shtoj tutje Bytyqi.
Vetëm dy muaj më pas, të njëjtët delegatë në Kaçanik, miratuan edhe Kushtetutën e Kaçanikut, ku Kosova u deklaruar formalisht si Republikë.
