Ka më shumë se një vit e gjysmë që qeset e plastikës janë bërë me pagesë.
Qysh në hyrjen në fuqi të këtij vendimi, ishte thënë se i njëjti do të ndihmojë në ruajtjen e ambientit.
Por qytetarët nuk mendojnë që kjo nismë ka pasur rezultat.
“Nuk mundet me qenë ambienti më i pastër se prapë po ka qese nëpër duar”, thotë qytetari Hasim Canolli.
E një tjetër qytetar thotë se do ishte mirë që në vend të qeseve, të përdoren çanta të ndryshme.
“Pasi që është për ndotjen e ajrit është më mirë me i bë disa të harrnit bilës si këtyre herë, se këto po duhet me i hedh në bërllok e kjo në bërllok për sa shkon 100 vite kjo nuk zhduket”, shprehet Salih Hajdari qytetar.
Krejt këtë proces e sheh ndryshe profesori i mjedisit, Sami Makolli.
Sipas Makollit, pagesa për qese të plastikës ka reduktuar dukshëm ndotjen e mjedisit.
“Mendoj se e ka reduktuar për 50% në ato se çfarë ne kemi punuar me studentë edhe me studimet tona empirike. Mendojmë se rreth gjysma e qeseve që kishin përfunduar në mjedis tani më veç janë reduktuar. Ende ka vend normalisht, se ende nuk është duke u zbatuar plotësisht furrat ende nuk janë duke i shit qeset me pagesë edhe shumë dyqane të vogla, pastaj kemi zonat rurale”, thotë ai.
Edhe nga organizatat për mbrojtjen e mjedisit e thonë të njëjtën gjë.
“Në masë të madhe po zbatohet, ne e shohim megjithatë në një pjesë të madhe të marketeve të dyqaneve të cilat i japin me pagesë qeset e plastikës, e shohim një reduktim të përdorimit të tyre dhe sigurisht që ka ndikuar pozitivisht, pra është një projekt i mirë që ka ndodh. S’ka rëndësi çmimi sa është mjafton që t’i duhet të paguash diçka dhe vetvetiu kjo në vetëdijen e njerëzve do të ndikojë që të marrin më pak qese dhe të mos kërkojnë si ishte në të kaluarën që merreshin me shumicë”, thotë Luan Hasanaj.
Nëse një qytetar dëshiron të pajiset me një qesë plastike, ai duhet të paguajë 0.5 cent për të.
Ky vendim i cili kishte hyrë në fuqi në tetor të vitit 2023, ishte kundërshtuar nga Shoqata për mbrojtjen e konsumatorëve, e gjithashtu edhe nga një pjesë e qytetarëve.
