Nënkryetari i Lëvizjes Vetëvendosje, Glauk Konjufca, dhe kandidati për kryetar të Kuvendit nga kjo parti, Albulena Haxhiu, kanë mbajtur një konferencë për media një ditë pas vendimit të Gjykatës Kushtetuese, e cila përcaktoi që deputetët janë të detyruar që brenda 30 ditëve të përfundojnë seancën konstituive të legjislaturës së re.
Sipas Konjufcës, aktgjykimi i Gjykatës i dha të drejtë Vetëvendosjes, duke theksuar se një nga pikat më të rëndësishme është që në rast të bllokadës, partitë janë të obliguara të arrijnë marrëveshje politike.
“Ky obligim nuk vlen vetëm për kryetarin e Kuvendit, por për të gjitha subjektet,” theksoi ai.
Konjufca shtoi se Vetëvendosje e ka interpretuar vendimin si mbështetje për të drejtën e partisë fituese për të propozuar kryetarin e Kuvendit, por që kjo qasje është hasur me bllokadë nga partitë opozitare.
“Ne ndërmorrëm një seri veprimesh, përfshirë ftesën për krerët e subjekteve politike, në përpjekje për të ndihmuar konstituimin e Kuvendit,” tha ai.
Sipas tij, vendimi i Gjykatës thekson se bllokada nuk mund të zbatohet vetëm ndaj kryetarit të Kuvendit, por përgjegjësia për konstituimin e legjislaturës është kolektive.
“Interpretimi i pikës lidhur me raportin mes kryetarit dhe nënkryetarëve është që të votojmë të gjithë së bashku, pa u përqendruar në emrat e propozuar,” shpjegoi Konjufca.
Ai përfundoi duke theksuar se, “Konstituimi i Kuvendit është përgjegjësi e të gjithëve, jo vetëm e grupit parlamentar që doli i pari në zgjedhje. Obligimi është i të gjithëve.”
