Deputetja e Lëvizjes Vetëvendosje, Fitore Pacolli, ka deklaruar se subjektet politike ende nuk kanë marrë një ftesë të dytë nga presidentja e Kosovës, Vjosa Osmani, për një takim të ri lidhur me moskonstituimin e Kuvendit.
Pacolli është shprehur se nuk ka një shpjegim të qartë pse ka ndodhur kjo, por ka sugjeruar se mund të jetë që Osmani është duke pritur vendimin e Gjykatës Kushtetuese për të vepruar.
“Presidentja Osmani ka thënë se do t’i takoj liderët politikë përsëri por me aq sa kam unë kam informacion akoma nuk ka dërguar ndonjë ftesë të dytë. Nuk kam shpjegim pse ka ndodhur kjo po ndoshta presidentja është duke pritur vendimin e Gjykatës Kushtetuese”, ka thënë Pacolli në emisionin “Këndi i debatit” në Tëvë1.
Megjithatë, ajo ka theksuar se nëse presidentja Osmani kërkon bashkëpunim për zhbllokimin e ngërçit, Vetëvendosje është e gatshme të marr hapa në këtë drejtim.
“Presidentja edhe në një letër publike të cilën ia ka drejtuar deputetëve të Kuvendit të Kosovës ka kërkuar që të gjejmë zgjidhje që të bashkëpunojmë, për këtë arsye edhe kryesuesi i Kuvendit Avni Dehari ka kërkuar që të ndërrojmë formën e votimit dhe të procedojmë në një mënyrë tjetër sepse duhet të lëvizim tutje. Nëse presidenca prapë kërkon në një formë që të bashkëpunojmë ne jemi të gatshëm që të bashkëpunojmë dhe të marrim hapat, mirëpo nuk po varet vetëm nga Lëvizja Vetëvendosje. Ne kemi marrë disa hapa të cilët neve na lejohen”, ka bërë të ditur Pacolli.
