Ka bërë qindra kilometra për të ardhur në Kosovë.
Është një nga palestinezet i cili tash e një muaj është duke qëndruar në Qendrën e Azilantëve në Magure të Lipjanit.
Lufta e nisur në Gaza ka detyruar 28 vjeçarin ta lëshojë vendlindjen dhe të marrë rrugë të pasigurt në Evropë.
“Para tre muajve jam larguar nga Palestina pa pasaportë dhe pa asgjë i vetëm kam marrë rrugën për të shkuar tek familjarët e mijë në Evropë. Rruga ka qenë shumë e vështirë, nga Palestina kam shkuar në Egjipt, pastaj në Jordani dhe jam kthyer prapë në Egjipt. Por nuk jam ndaluar kam marrë rrugën prapë dhe tani kam përfunduar këtu në Kosovë. E gjithë kjo rrugë ishte e vështirë për mua, më duhej të paguaj shumë”, tha azilanti nga Palestina.
Ailanti, cili nuk ka dashur të identifikohet, tregon se si është jeta në Palestinë, mes luftës që po zhvillohet tash e dy vite.
“Atje është shkatërruar gjithçka. Sulmet nuk janë ndaluar asnjëherë. Ka pasur pushime një ditë, dy por prapë kanë filluar. Ka probleme të shumta në Palestinë. Të sigurosh ushqim është shumë e vështirë, nëse ke për të ngrënë atje, ti je mbreti. Po më mungojnë shumë gjëra nga Palestina, shoqëria ime, familja, puna ime si dhe shtëpia. Tash nuk kam askënd në Palestinë, një pjesë janë larguar në Evropë kurse një pjesë tjetër i kanë vrarë”.
Ani pse jetesa këtu i duket shumë e mirë, për këtë të ri nga Palestina, Kosova nuk është destinacioni i fundit.
“Jetesa në Kosovë është shumë e mirë, njerëzit nuk hezitojnë të ndihmojnë për çfarëdo që t’i do të pyesësh. Kosova është vendi i mirë për të jetuar në Ballkan. Po kam mësuar disa fjalë në gjuhën shqipe si përshëndetje , faleminderit. Nuk e di si do të veprojë ndoshta do të jetoj këtu, ose do të shkojë në Holandë, Gjermani ose Suedi. Në këto shtete kam disa familjar të mijë të cilët janë zhvendosur nga Palestina”.
E përveç tij, në Qendrën e Azilantëve në Magure janë të strehuar edhe 17 azilkërkues të tjerë të cilët vijnë nga vende si Siria, Pakistani, Jordani,Turqia, Maroko, Palestina e Ukraina.
