Deputeti i Partisë Demokratike të Kosovës (PDK), Nait Hasani, ka deklaruar qartë se nuk është i gatshëm të mbështesë ndonjë koalicion me Lëvizjen Vetëvendosje (LVV), përveç nëse ky subjekt politik merr hapa konkretë për të mbrojtur interesat e ish-pjesëtarëve të UÇK-së në proceset e Gjykatës Speciale.
Hasani në studion e “Info Natës”, tha se në zgjedhjet e fundit ka marrë besimin e mbi 30 mijë votuesve me qëndrimin e tij kundër bashkëpunimit me VV-në dhe se nuk ka mandat për ta ndryshuar këtë qëndrim. Sipas tij, çdo bashkëpunim tjetër pa këtë qëllim do të ishte i pajustifikueshëm dhe i papranueshëm për të dhe për elektoratin e tij.
“Unë në zgjedhje kam dal personalisht dhe kam deklaruar te qytetarët që më kanë votuar, te ata 30 mijë njerëz që brenda ditës së 9 shkurtit kanë votuar për mua që të mos bëj koalicion me VV-në. Ata e kanë vlerësuar qëndrimin tim. Ata kërkojnë me mbajt qëndrimin tim. Ata kërkojnë që të jem në pikat që ata e vlerësojnë. Prandaj, nuk mund ta bëj ndryshimin”, deklaroi ai në Tëvë1.
“Ndryshimi të bëhet vetëm me një kusht. Kushti është nëse kjo qeveri do të hyjë në koalicion me PDK-në, është Gjykata Speciale. Atje mund të ma ndryshojë mendjen. Përndryshe me asnjë çmim!. Nëse ajo thotë ‘po, ja ku është ministria, qeveria, buxheti, ja ku është rezoluta, ja ku janë veprimet e komisionit hetimor të Gjykatës Speciale, me lobuimet që atje ta fitojmë betejën e UÇK-së, të shtetit të Kosovës, jam i gatshëm ta bëj! E kundërta, cila është arsyeja ta votojë?!”./teve1.info/
