Me rastin e 26-vjetorit të Ditës së Çlirimit të Kosovës, kryeministri në detyrë Albin Kurti, së bashku me zëvëndëskryeministren Donika Gërvalla dhe ministrin e MBP-së, Xhelal Sveçla, kanë bërë homazhe në Kompleksin Memorial “Adem Jashari” në Prekaz.
Kurti tha se Prekazi është një vend i rëndësishëm për këtë ditë që populli i Kosovës sot e gëzon, raporton KosovaPress.
Ai i shpreh se familja Jashari është bartëse e procesit të lirisë se vendit ku para 26 viteve u shoqërua edhe me ndërhyrjen e avionëve të NATO-s kundër Serbisë armike.
“Sa herë që vie 12 qershori, rikthehemi në Prekaz, në këtë vend që paraqet kryeqytetin e kryengritjes sonë, në këtë vend të familjes së jashtëzakonshme Jashari, aq të jashtëzakonshme saqë të papërsëritshme dhe të kryekomandantit Adem Jashari, të Ushtrisë Çlirimtare të Kosovës e cila ishte bartëse e procesit të lirisë, që pata 26 viteve u shoqërua edhe me ndërhyrjen e avionëve të NATO-s, kundër Serbisë armike, agresore, pushtuese, okupatore e sidomos shoveniste ndaj shqiptarëve”, tha Kurti, shkruan KP.
Tutje, Kurti shtoi se është krenari për të arriturat që ka shteti dhe për lirinë që e gëzon ky popull, por edhe me pikëllim për ata që humbën jetën për këtë ditë.
“Me 12 qershor jemi përplot krenari për të arriturat tona për shtetin dhe lirinë që gëzojmë por njëkohësisht edhe me mall e pikëllim për ata bijë e bija që nuk janë në mesin tonë e ishin më të mirët sepse u sakrifikuan e u fliuan për çlirimin e vendit dhe lirinë e popullit”, shtoi Kurti.
Njëzet e gjashtë vjet më parë në Kosovë u vendosën 50 mijë ushtarë të NATO-s dhe bashkë me ta edhe administrata e përkohshme e Kombeve të Bashkuara për të çliruar Kosovën nga armiku i saj, Serbia
