Policia e Kosovës ka njoftuar se ka arrestuar tre persona të dyshuar për mashtrimin e dhjetë grave ish-pjesëmarrëse në luftërat e Sirisë dhe Irakut.
Në njoftim thuhet se të dyshuarit iu kishin premtuar viktimave donacion në emër të integrimit të tyre në shoqërinë Kosovare.
Të njëjtat, thuhet se janë bindur që të aplikojnë për marrjen e donacioneve në një Institucion mikrofinanciar me seli në Prishtinë duke ju prezantuar se ato do të marrin donacion, por që në realitet kanë nënshkruar kontrata për kredi në vlerë prej 4500 deri në 5000 euro.
“ I dyshuari me iniciale (R.D.) ka identifikuar viktimat dhe dërguar ato në institucionin mikrofinanciar për aplikim. I dyshuari me iniciale (V.G.) zyrtar në institucionit mikrofinaciar ka përpiluar dosjen dhe kontratat, ndërsa i dyshuari me iniciale (A.H.) ka aprovuar kreditë në cilësinë e menaxherit të këtij institucioni. Pas daljes së mjeteve në llogaritë bankare të palëve ankuese, i dyshuari (R.D.) ka shkuar së bashku me palët në banka duke tërhequr mjete më pas të gjithave ju ka dhënë nga 500.00 euro, ndërsa mjete tjera i ka marrë në emër të pagesave për zyrtarët të cilët i kanë kryer shërbimet”, thuhet në njoftim.
Sipas Policisë, palët ankuese e kanë kuptuar mashtrimin në kohën kur institucioni mikrofinaciar iu ka kërkuar atyre fillimin e pagesave të kredisë.
“Deri më tani janë intervistuar 10/persona palë të dëmtuara, ku vlera e dëmit llogaritet të jetë 45,000.00 euro”, bëhet e ditur në njoftim.
Dy të dyshuarve R.D. dhe V.G. iu është shqiptuar masa e ndalimit prej 48 orëve, ndërsa i dyshuari i tretë A.H. është liruar në procedurë të rregullt.
“Të gjitha veprimet, përfshirë masat e veçanta të hetimit janë kryer nën mbikëqyrje dhe koordinim të Prokurorit të lëndës nga Prokuroria Themelore në Prishtinë dhe vendimet tjera do të ndërmerren në bashkërendim të plotë”, theksohet në njoftim.
