Kuvendi i Kosovës pritet të mblidhet sot në orën 11:00 për të vijuar me përpjekjet për konstituimin e legjislaturës së re, në një seancë që do të jetë e 27-ta me radhë.
Fokus kryesor mbetet zgjedhja e kryetarit të Kuvendit, një proces që po zvarritet prej javësh për shkak të mungesës së konsensusit ndërmjet subjekteve politike.
Bllokada ka ardhur kryesisht si pasojë e dështimeve për të formuar Komisionin Ad-hoc, i cili është i domosdoshëm për të mbikëqyrur votimin e fshehtë për kryeparlamentarin.
Në seancën e fundit, nga 104 deputetë të pranishëm, vetëm 51 votuan në favor të formimit të komisionit – numër i pamjaftueshëm për miratim.
Kryesuesi i seancave, Avni Dehari, ka bërë thirrje të përsëritura që partitë të paraqesin emrat e propozuar për anëtarë të komisionit, por mungesa e bashkëpunimit politik po e thellon krizën institucionale.
