15 persona të dyshuar për kryerjen e veprave penale ’mashtrimi kompjuterik’’ dhe ‘’lëshimi i çeqeve pa mbulesë ose të rreme dhe keqpërdorimi i kartelave të bankës apo të kreditit’’ janë arrestuar të hënën nga Policia e Kosovës pas një operacioni të realizuar në koordinim me Prokurorinë Themelore të Gjilanit.
Sipas Prokurorisë, B.B., B.S., I.A., R.I., A.H., B.J., B.B., B.M., D.G., E.G., E.A., B.M., A.M., A.I. dhe Sh.M dyshohen se gjatë periudhës kohore janar – tetor 2024, në komunën e Vitisë, në bashkëpunim dhe ne marrëveshje paraprake ne mes vete kanë vepruar në mënyrë të organizuar me qëllim të përfitimit të kundërligjshëm pasuror, duke ndërhyrë në funksionimin e sistemit kompjuterik të një institucioni bankar.
“Nga hetimet paraprake, dyshohet se të pandehurit kanë shfrytëzuar hapësirën kohore prej 15 sekondash gjatë sinkronizimit ndërmjet transaksioneve të E-Banking dhe ATM-ve, për tërheqjen e shumave të ndryshme të parave nga Raiffeisen Bank, duke shkaktuar dëm material në shumë prej njëqind e tetëdhjetë e gjashtë (186.000) mijë euro përmes mashtrimit dhe ndërhyrjes në sistemin kompjuterik të bankës”, thuhet në komunikatë.
Po ashtu, Prokuroria ka bërë të ditur se pas ndalimit të të dyshuarve për 48 orë do të paraqes kërkesë për caktimin e masës së paraburgimit ndaj tyre.
