Seanca e parë u mbajt me 15 prill.
Por, as pas 21 tentimeve, nuk po merr epilog të suksesshëm.
Kësisoj, Lëvizja Vetëvendosje, assesi nuk po i arrin 61 votat e kërkuara, për ta vendosur Albulena Haxhiun në krye të parlamentit.
E këto vota, sipas deputetit Lutfi Haziri, Albin Kurti po i kërkon në LDK.
“Përtej dyve më shumë janë kontaktuar por është çështje që edhe ato takime i kanë zbardhur vet, që nënkupton që LDK është unike, ne veprojmë bashkë politikisht dhe jemi të interesuar me i dhënë oksigjen politik krejt kësaj situate, kështu që gjendja jonë, raporti, statusi është shumë i qartë, ne jemi këtu, kemi bërë një ofertë për një qeveri kalimtare, nuk ka rrugë tjetër”, ka thënë Haziri.
E nga AAK, thonë se Vetëvendosje, zgjidhje po kërkon edhe nga politikanë jashtë vendit.
“Ka pasur edhe të Duda Baljes, sepse janë deklaruar vet se kanë aktivizuar miqtë edhe nga VLEN nga Maqedonia e Veriut, sepse në fakt iu kanë borxh sepse edhe këta iu kanë ndihmuar që të vijnë në pushtet. Janë qëndrime individuale të deputetëve, secili deputet vendos individualisht. Ne nuk kemi as ndikim tek Adem Hoxha, por nuk kemi ndikim as te Duda Balje. Këta janë deputetë, kanë qëndrimet e veta, e dinë pse nuk po bashkëpunojnë me LVV-në dhe i keni parë edhe deklaratat e tyre të cilat kanë qenë të qarta”, thotë Time Kadrijaj.
Vota për Albulena Haxhiun, nuk kanë as nga Lidhja Demokratike të Kosovës.
Por, urimet nuk munguan të dielën.
Albulena, suksese! – Faleminderit Arben, shihemi!”, ishte biseda e Arben Gashit dhe Albulena Haxhiut.
Ndërsa nga Partia Demokratike e Kosovës, kërkuan reflektim nga partia fituese.
“Fatkeqësisht asgjë nuk është duke ndodhur. I bëjmë edhe një herë apel që të reflektojë, në mënyrë që të ecim tutje. Faleminderit shumë. Kërkoj falje që s’po kemi lajme më të mira për juve”, tha Vlora Çitaku.
E nga VV, thonë se ish-opozita, po e përdor bllokimin si mjetin e vetëm që e kanë në duar.
“Nuk është problemi te znj. Haxhiu, por problemi qëndron në atë se ata duan ta mbajnë edhe më tej të bllokuar institucionin më të rëndësishëm në vend. Po e përdorin të vetmin mjet që e kanë në duar për bllokim, të mos marrin pjesë në votim”, u shpreh Arbreshë Kryeziu.
Ndryshe, të dielën, Pro votimit për komisionin për votim të fshehtë të kryeparlamentarit pro votuan vetëm 53 deputetë.
