Poligon ushtarak në Babaj Bokës në Gjakovë do të jetë konak i një organizimi ushtarak me përmasa botërore nga 25 maji deri më 6 qershor.
Kjo pasi Forca e Sigurisë së Kosovës do të jetë nikoqire e ushtrimit më të madh ushtarak në Evropë “Defender 2025”.
Në këto data, 29 vende me 25 mijë trupa do të realizojnë stërvitje shumëkombvëshe e cila udhëhiqet nga ushtria amerikane.
Zëdhënësja e Ministrisë së Mbrojtjes, Liridona Gashi tregon se ky ushtrim ka për qëllim të tregojë fuqinë e ndërveprimit të shteteve shumë-kombëshe në një ushtrim të përbashkët.
“Për ne pjesëmarrja në këtë ushtrim ndërkombëtar është i një rëndësie të veçantë për shkak se nëpërmjet këtij ushtrimi ne do të mund të demonstojmë kapacitetet luftarake të FSK-së për mbrojtje të territorit, por gjithashtu të mbështetjes ushtarake të autoriteteve civile. Meqenëse është ushtrim shumëkombësh është edhe një mundësi shumë e mirë që pjesëtarët tanë të ngrisin edhe kapacitetet e tyre dhe shkathtësisë sa i përket ndërveprueshmërisë në operacione të tilla shumëkombëshe”, ka thënë Gashi.
Ajo shton se FSK-ja është ndërtuar mbi doktrinat e NATO-s, andaj edhe ky ushtrim do të forcojë nevojat operacionale të saj.
“Dhe një pjesë e madhe e pjesëtarëve të FSK-së janë edhe oficerë të shkolluar në Akademitë ushtarake në SHBA, rrjedhimisht përgatitja e tyre profesionale dhe të gjitha aftësitë të cilat janë përfituar gjatë shkëmbimit të përvojave në ushtrimet e mëparshme të ‘Defender’ duke përfshirë ‘Defender’ në vitin 2021 pastaj në vitin 2023 ka bërë që të avancohen edhe përgatitjet profesionale të FSK-së”, ka përfunduar Gashi.
Edhe koloneli në pension i FSK-së, vlerëson se çdo aktivitet i përbashkët me ushtrinë amerikane është i dobishëm për vendin.
“Tani FSK-ja ka arritë një nivel dhe një kapacitet të nevojshëm dhe i cili është i atij niveli që mund t’i plotësojë disa kushte dhe disa kërkesa të cilat janë të nevopjshme për trajnime të tilla, kështu që them se në këtë tad të zhvillimit të vetë FSK-ja ka arritë nivelin e duhur dhe ky poligon në Babaj Bokës i plotëson disa kritere”, ka thënë Hysen Gecaj, kolonel në pension.
Ushtrimi ka filluar më 11 maj në disa vende tjera dhe që pritet të vazhdojë deri më 24 qershor.
