Publicisti, Kim Mehmeti të mërkurën në emisionin “Këndi i Debatit” në Tëvë1 ka folur për rezultatin dhe mbarëvajtjen e zgjedhjeve të 11 majit në Shqipëri.
Mehmeti ka thënë se kryeministrin Edi Rama nuk mund ta mundësh me votë pasi sipas tij të përballesh me të është sikur të përballesh me mafian.
Ai ka shtuar se për ta arritur një gjë të tillë duhet t’i luftosh dhe t’i përvetësosh të gjitha institucionet e shtetit që posedon Rama.
“Piktorin nuk mund ta mundësh me votë sepse të përballesh me të është sikur të përballesh me mafian. I ke të gjitha brenda, i ke institucionet e shtetit e ke policinë, të gjitha i ke edhe të gjitha ato duhet t’i luftosh e që ti luftosh ato duhet që t’i përvetësosh të gjitha ato që i ka ai”, ka deklaruar ai.
Mehmeti më tej është shprehur se Rama nuk ka nevojë të jetë i pëlqyer nga votuesit sepse në Shqipëri ka votues të paguar e jo votues që zgjedhin.
“Ai nuk ka nevojë të jetë i pëlqyer nga votuesit sepse ai ka votues të paguar. Atje pjesa më e madhe e administratës edhe paguhet që një herë në katër vite ta votojë rilindjen, pra atje ka votues të paguar nuk ka votues që zgjedhin. Ato nuk ishin zgjedhje se kushtet nuk janë të barabarta për të gjithë pjesëmarrësit në zgjedhje sepse të gjitha mediat janë me qeverinë, të dirigjuara nga qeveria, administratën shtetërore e ke të paguar etj..”, ka thënë Mehmeti./teve1.info/
