Kryeministri në detyrë, Albin Kurti së bashku me kryetarin e Podujevës, Shpejtim Bulliqi të martën kanë vendosur gurthemelin e kompleksit të Banimit të Përballueshëm dhe Social në këtë komunë.
Sipas komunikatës, ky kompleks do të ketë gjithsej 133 njësi banimi, prej të cilave 106 do të jenë njësi të banimit të përballueshëm, ndërsa për banim social do të jenë 27.
Vlera e projektit thuhet se është gati 13.6 milionë euro dhe punimet planifikohen të finalizohet Brenda tre vjetëve.
“Sipërfaqja e tërësishme e ndërtimit do të jetë 20,180.01 m². Banesat do të jetë të katër tipeve: 53 m², 66 m², 77 m² dhe 87 m². Vlera e projektit është gati 13.6 milionë euro dhe punimet planifikohen të finalizohet brenda 3 vjetëve. Ky projekt realizohet në bashkëpunim ndërmjet ministrisë së Mjedisit, Planifikimit Hapësinor dhe Infrastrukturës dhe Komunës, me ç’rast komuna kontribuon me lokacionin dhe infrastrukturën përcjellëse, ndërkaq investimin kapital dhe mbikëqyrjen e punimeve e bën ministra”, thuhet në komunikatë.
Me rastin e vendosjes së gurthemelit, Kurti ka deklaruar se banimi është e drejtë themelore njerëzore.
“Banimi është e drejtë themelore njerëzore dhe prandaj ne punojmë anembanë Kosovës, në mënyrë që qytetarët për jetesë të dinjitetshme të kenë banesa me kushte të mira për familjet e tyre”, është shprehur ai.
Më tej Kurti ka shprehur keqardhje që vetëm 13 komuna nga 38 gjithsej kanë aplikuar për projektin për Banim të Përballueshëm dhe Social, çka sipas tij po dëshmon se oferta e qeverisë është më e madhe sesa kërkesa e komunave.
“Kryeministri Kurti falënderoi ministrinë e Mjedisit, Planifikimit Hapësinor dhe Infrastrukturës, Kryetarin e Komunës, Bulliqi, drejtoritë komunale dhe të pranishmit tjerë për punën dhe kontributin e tyre deri në inaugurimin e punimeve të këtij projekti me rëndësi të madhe si për komunën ashtu edhe për qytetarët e Republikës”, theksohet në komunikatë./teve1.info/
