Prokuroria Speciale ka njoftuar se të enjten është arrestuar një person i nacionalitetit serb, nën dyshimet për krime lufte në komunën Zveçanit.
Teve1 mëson se i dyshuari është Milojko Gjorgjeviq, ish-polic serb.
Sipas Prokurorisë, i njëjti është arrestuar me urdhër të prokurores speciale Florije Salihu- Shamolli, pas hetimore disa mujore në bashkëpunim me Hetuesit e Krimeve të Luftës.
“Sipas hetimeve M. D, dyshohet se në cilësinë e komandantit të Njësisë së Policisë në këtë rajon, në kuadër te MUP-it, gatë viteve 1998/1999 ka marrë pjesë në vrasje, dëbim, plaçkitje, torturë, e rrahje të civilëve shqiptarë”, thuhet në njoftim.
Më tej thuhet se, dyshohet se gjatë prillit të 1999-ës, i pandehuri M.D, së bashku me forcat serbe të organizuara në formacione të strukturuara, përfshirë Ushtrinë Jugosllave dhe Policinë Serbe, mori pjesë në operacionin në fshatin Zhazhë, ku kishin mbetur të vrarë shtatë civilë.
Bëhet e ditur se trupat e civilëve shqiptarë janë gjetur pas përfundimit të luftës në varrezat e fshatit Suhodoll, në komunën e Mitrovicës.
“Brenda afatit ligjor, sipas Kodit te Procedurës Penale, Prokuroria Speciale do të paraqes në Gjykatën Themelore te Prishtinës, Departamenti Special kërkesën për paraburgim. “, thuhet në njoftim./teve1.info/
