Kryeministri në detyrë i Kosovës, Albin Kurti ka përkujtuar mbi 120 civilë shqiptar të vrarë në Qyshk, Zahaq, Pavlan dhe Llabjan.
Kreu i qeverisë ka thënë se për këto krime të rënda, drejtësia deri tani ka qenë shumë e ngadaltë.
Ai ka thënë se për këto krime duhet të japë përgjegjësi shteti i Serbisë.
Madje, ai tha se Kosova nuk mund dhe nuk do t`i harrojë asnjëherë krimet e kryera nga Serbia gjatë luftës.
“Për këto krime të rënda, dëbimet e civilëve shqiptarë, shkatërrimet e pronave, vrasjet dhe plaçkitjet gjatë zhvendosjes së dhunshme, drejtësia deri tani ka qenë shumë e ngadaltë. Të gjitha krimet e luftës, krimet kundër njerëzimit dhe gjenocidit, së bashku me kryerësit dhe urdhërdhënësit e tyre, duhet të vihen para drejtësisë. Për to duhet të japë përgjegjësi drejtpërdrejt shteti i Serbisë. Kosova nuk mund dhe nuk do t’i harrojë asnjëherë krimet e kryera nga Serbia gjatë luftës. Populli ynë ka mbijetuar dhe qëndron i fortë e krenar. Së bashku, çdo ditë, po e forcojmë Republikën tonë, si jetësim të idealeve të dëshmorëve e martirëve që sakrifikuan gjithçka për lirinë tone”, ka shkruar Kurti në Facebook./teve1.info/
