Numërimi i votave në Shqipëri po vazhdon.
E drejt rrugës për ta siguruar mandatin e katërt është kryeministri aktual, Edi Rama.
Partia Socialiste, po prin e para me 52.55 për qind të votave.
E ende pa përfunduar numërimi, Rama ka filluar të marrë urimet e para.
Një prej tyre, e ndau menjëherë në Facebook.
“Telefonata e vëllaut tim Hashim ishte tejet prekëse dhe Komandanti ishte në formën e vet më të mirë”, ka shkruar Rama.
Por, urime të tilla për Ramën, nuk kanë analistët politik në Shqipëri.
Kujtim Cakrani, thotë se qytetarët shqiptarë u shtantazhuan për votën e tyre.
“Ju shqiptarët e Kosovës apo të Dardanisë, jeni mësuar me procese zgjedhore normale, ku vota nuk shitet, nuk blihet, ku qytetarët nuk shantazhohen apo kërcënohen. Në Shqipëri dje ka ndodhur një terrorizëm zgjedhor, dhe ky terrorizëm zgjedhor ka emër: Edi Rama dhe Partia Socialiste e Shqipërisë. Dje shqiptarët e kanë përjetuar një terror, që edhe gjatë diktaturës komuniste as Enver Hoxha nuk e ka arriti gjatë shqiptarët. Njerëzit këtu votojnë të shantazhuar për bukën e gojës, vendin e punës, të shantazhuar për bizneset e tyre dhe kështu më radhë”, është shprehur për Tëvë1 analisti nga Shqipëria.
Cakrani thotë se rastet kur u tentua të keqpërdoret vota, ishin të dukshme.
“Ju e keni parë çfarë ka ndodhur në një lagje në qendër të Tiranës, ku terroristët elektoral, pra një drejtoreshë e rëndësishme që e ka zgjedhur vet Edi Rama, vidhte vota dhe u largua me vrap që mos ta kapte kamera. Në Shqipëri kjo është situata sot. Nuk e di nëse ndërkombëtarët do ta pranojnë rezultatin apo jo, por në krye të shtetit shqiptar është një terrorist që quhet Edi Rama që ka shkatërruar strukturën zgjedhore në këtë vend”, thotë ai.
Ndërkohë, deri në mesditën e së hënës, Partia Demokratike e Sali Berishës, i mori vetëm 34.22 për qind të votave.
