Presidenti rus, Vladimir Putin ka propozuar rifillimin e bisedimeve të drejtpërdrejta me Ukrainën në Stamboll më 15 maj, “pa parakushte”.
Oferta erdhi si përgjigjje ndaj kërkesës së Ukrainës dhe aleatëve të saj për Moskën për t’u zotuar për një armëpushim 30-ditor pa kushte ose përndryshe do të përballet me sanksione shtesë.
Putin iu referua bisedimeve të pasuksesshme të paqes të vitit 2022 që u zhvilluan në Stamboll në mars, menjëherë pas pushtimit në shkallë të plotë nga Moska, dhe propozoi “rinisjen” e tyre pa parakushte në komentet për gazetarët në orët e para të së dielës.
“Ne jemi të përkushtuar për negociata serioze me Ukrainën”, tha Putin, duke shtuar se nuk e përjashton mundësinë e arritjes së një armëpushimi më vonë, gjatë bisedimeve të drejtpërdrejta me Ukrainën, ka raportuar AP.
Propozimi i Putinit erdhi pasi udhëheqësit e katër vendeve të mëdha evropiane kërcënuan të shtojnë presionin ndaj Moskës nëse ajo nuk pranon një armëpushim 30-ditor pa kushte në Ukrainë që ata ofruan të shtunën në një shfaqje të fortë uniteti me Kievin.
