Kryeministri në detyrë, Albin Kurti në 26 vjetorin e betejës së Çabratit në Gjakovë ka përkujtuar ushtarët e Brigadës 137 “Gjakova” të Ushtrisë Çlirimtare të Kosovës të rënë në këtë betejë.
Kurti ka thënë se ata përkundër pabarazisë së madhe në armatim, e mbrojtën me guxim qytetin dhe popullsinë civile nga agresioni barbar i forcave okupatore serbe.
Ai ka shtuar se si institucione e si shoqëri, angazhohen që kujtesa historike të jetë udhërrëfyese për të ardhmen e Kosovës.
“Në 26 vjetorin e betejës heroike të Çabratit në Gjakovë, përkujtojmë ushtarët trima të Brigadës 137 “Gjakova” të Ushtrisë Çlirimtare të Kosovës. Përkundër pabarazisë së madhe në armatim, e mbrojtën me guxim qytetin dhe popullsinë civile nga agresioni barbar i forcave okupatore serbe. Nga këto luftime të ashpra ranë dëshmor: Kushtrim Hoxha, Ali Hoxha, Tom Gjoka, Bujar Roka, Visar Juniku, Ahmet Gjikolli, Dashmir Krasniqi, Sefedin Xërxa, Yllka Domi, Hazyr Këpuska, Ilir Berisha, Agim Haxhiavdyli, Taulant Nura, Mentor Shtaloja dhe Hamëz Zymberi. Sot përkujtojmë sakrificën e djemve dhe vajzave që luftuan në betejën e Çabratit. Përkujtojmë të gjithë martirët e Gjakovës, që u vranë, u rrëmbyen dhe u zhdukën dhunshëm në ato ditë të errëta të majit. Nderojmë ҫdo ditë 1022 martirët dhe 361 dëshmorët e Gjakovës, dhe sakrificën që na mundësoi ta jetojmë lirinë e ta gëzojmë shtetin tonë. Si institucione e si shoqëri, angazhohemi që kujtesa historike të jetë udhërrëfyese për të ardhmen e Republikës së Kosovës. Lavdi dëshmorëve të Çabratit dhe të gjithë të rënëve për lirinë e Kosovës! I përjetshëm qoftë kujtimi për ta”, ka shkruar ai në Facebook.
