Shefi i NATO-s kërkon rritje të ndjeshme të shpenzimeve për mbrojtje nga vendet evropiane dhe Kanadaja – “Topi është në fushën e Rusisë”
Sekretari i Përgjithshëm i NATO-s, Mark Rutte, ka dhënë sinjale të forta pas një serie takimesh të nivelit të lartë në Uashington me Presidentin Donald Trump dhe zyrtarë amerikanë, ku në fokus ishin siguria euroatlantike, Ukraina dhe përgatitjet për Samitin e NATO-s që do të mbahet në Hagë.
“Po shohim një NATO që po shpenzon shumë më tepër për mbrojtje, veçanërisht nga ana evropiane dhe kanadeze. Kjo është e nevojshme për të qëndruar të sigurt,” u shpreh Rutte, duke shtuar se me përpjekjet aktuale nuk do të jenë më miliarda, por triliona të investuara në vitet që vijnë.
Ai theksoi se synimi i përbashkët duhet të jetë tejkalimi i objektivit prej 2% të PBB-së për mbrojtje.
“Duhet të jetë dukshëm më i lartë se 2%. Kam thënë edhe më parë – në veri të 3%, dhe kjo nuk është një dëshirë, por bazuar në planifikim të kujdesshëm,” tha ai.
ShBA mbetet e përkushtuar ndaj NATO-s
Rutte përgënjeshtroi zërat për tërheqje amerikane nga procesi i paqes në Ukrainë, duke theksuar rolin aktiv të SHBA nën udhëheqjen e Trump.
“Nuk po shoh një situatë ku SHBA largohet. Përkundrazi, kjo mund të çojë në një fund pozitiv,” tha ai.
Ai përforcoi se Uashingtoni mbetet plotësisht i angazhuar ndaj nenit 5 të NATO-s dhe sigurisë së Evropës, ndërsa vendet evropiane duhet të marrin më shumë përgjegjësi për të lejuar SHBA të përqendrohet më shumë në rajonin Indo-Paqësor.
Ukraina dhe Krimea, çështje të hapura
Në lidhje me bisedimet e mundshme për paqen midis Ukrainës dhe Rusisë, Rutte refuzoi të komentojë për detajet apo për çështjen e Krimesë.
“Nuk më ndihmon nëse komentoj për çdo aspekt të negociatave,” tha ai, por shtoi se Ukraina po luan rol aktiv dhe “topi është në fushën ruse”.
