Është deputeti më i moshuar në Kuvendin e Kosovës.
Kësisoj, rregullorja e vendosi Avni Deharin nga Lëvizja Vetëvendosje, në ulësen e kryeparlamentarit për të drejtuar seancën konstituive të Kuvendit të Kosovës.
Por, po këtë rregullore, sipas monitoruesve të punës së Kuvendit, Dehari e shkeli e ende pa u betuar si deputet.
“Në radhë të parë kryesuesi i seancës sot nuk ka pasur fare nevojë qe t’i ftoj në konsultim subjektet politike. Afati 48 orësh është pikërisht për çështjen e konsultimeve mes subjekteve politike. Unë vlerësoj se në vend që të shkruheshin letra për presidenten, përgjigjet e se cila veç se diheshin, ndonëse vlerësoj pozitivisht qasjen e presidentes, besoj që është dashur që të mbaheshin konsultimet e nevojshme në mënyrë që të trajtohej dhe të zgjidhej kjo çështje. Zotëri Dehari nuk e administroj seancën siç duhet sepse në radhë të parë i njëjti nuk shkoj sipas rendit të ditës e që në këtë rast do të duhej mblidhej edhe një herë komisionit për verifikimin e mandateve, nxjerrja serish i një raporti”, thotë monitoruesi nga KDI, Eugen Cakolli.
Ky veprim i kryesuesit, bëri që edhe përpjekja e dytë për konstituim, të dështojë.
Për këtë, nga KDI, kanë një thirrje.
“Ne i bëjmë thirrje kryeministrit në detyrë dhe gjithë ministrave që në funksion të zhbllokimit të punës së Kuvendit të dorëzojnë dorëheqjet e tyre formale siç ua kërkon ligji për qeverinë që është miratuar po nga legjislatura e kaluar, në mënyrë që t’i hapet rrugë konstituimit të Kuvendit dhe të evitohen bllokada të panevojshme”, thotë Cakolli.
E njohësit e protokollit, thonë se një situatë e tillë mund të vazhdojë deri në zgjedhjen e kryeparlamentarit.
“Faza e dytë fillon nga nesër, kur kryesuesi Avni Dehari, ka të drejtë të drejtë t’i drejtohet përsëri presidentes, dhe seanca e re ftohet përsëri nga presidentja siç është ftuar para dy ditësh. Këtu fillon përsëri nga fillimi dhe nëse votohet raporti i komisionit, atëherë procedohet me fazat e tjera”, tha njohësi i protokollit, Tomorr Avdija.
Tentimin e tretë për konstituimin e Kuvendit dhe formimin e qeverisë së re, do të jetë mesditën e së shtunës.
