Profesori universitar, Mazllum Baraliu dështimin e seancës konstituive të Kuvendit të Kosovës e ka parë si diçka që nuk do të duhej të ndodhte.
Baraliu në emisionin “Ditari” në Tëvë1 ka thënë se përgjegjës për këtë dështim janë edhe pozita edhe opozita.
Sipas tij votimi kundër në një komision teknik i cili i paraprin procesit të verifikimit të mandateve dhe betimit të deputetëve është votim kundër vetvetes.
“E kam parë si diçka që do të duhej të mos ndodhte. Si diçka që është përgjegjësi edhe e pozitës të deritanishme por edhe e atyre që kanë votuar kundër pa asnjë hezitim për arsye se votimi kundër në një komision teknik i cili i paraprin procesit të verifikimit të mandateve dhe betimit të deputetëve është votim kundër vetvetes”, ka thënë Baraliu.
Ai më tej ka shtuar se veprimi i pozitës ka mundur dhe ka bazë për t’u sqaruar edhe pse siç ka thënë ‘ligjet vërtetë janë kontradiktore’.
“Eshtë e çuditshme sesi për herë të parë ndodhin edhe këso çudirash parlamentare në parlament, në një legjislaturë sepse ky veprim ka mundur të sqarohet dhe ka bazë për t’u sqaruar ani pse ligjet vërtetë janë kontradiktore dhe janë me gabime të shumta me përsëritje të shumta, megjithatë ka mundur të gjendet zgjidhja dhe unë përgjegjësinë në këtë rast ia vë edhe pozitës edhe opozitës”, ka shtuar ai
Kuvendi i Kosovës ka dështuar të konstituojë legjislaturën e nëntë në seancën e së martës, kjo pasi raporti i Komisionit të Përkohshëm për Verifikimin e Mandateve nuk e ka marrë shumicën e votave të deputetëve.
Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës votuan kundër. Votën kundër ata e mbështetën në pretendimin se Albin Kurti dhe ministrat e kabinetit të tij duhet të japin dorëheqje nga ekzekutivi./teve1.info/
