Të premten do të protestohet sërish kundër shtrenjtimit të energjisë elektrike në sheshin “Zahir Pajaziti” në Prishtinë, nga ora 12:00.
Lidhur me këtë protestë Luan Hasanaj nga Iniciativa “Asnjë cent më shumë” në emisionin “Ditari” në Tëvë 1 është shprehur se presin që të jetë edhe më masive se ajo e herës së kaluar.
Hasanaj ka thënë se kjo do të ndodhë për shkak se sipas tij pas asaj proteste nuk është parë ndonjë reflektim as nga ana e ZRRE-së e as nga ana e institucioneve tjera përgjegjëse për mbrojtjen e interesit të qytetarëve.
“Sigurisht që protesta do të jetë më masive se herën e kaluar, do të ketë më shumë qytetarë që do të marrin pjesë sepse fatkeqësisht edhe pas protestës së shtunës së kaluar ne nuk kemi parë ndonjë reflektim nga ana e ZRRE-së, as nga ana e institucioneve tjera përgjegjëse të cilat e kanë për detyrë ta mbrojnë interesin e qytetarit, andaj kjo vetëm sa e ka rritur pakënaqësinë e qytetarit dhe atyre që do të marrin pjesë në protestë nesër”, ka thënë ai.
Ai ka shtuar se do të ishte lajmi më i mirë për qytetarët e Kosovës nëse ZRRE-ja të premten nuk e merr vendimin për shtrenjtim të çmimit të energjisë elektrike për 15 për qind.
“Kjo do të ishte lajmi më i mirë për qytetarët e Kosovës sepse një vendim i tillë në këtë kohë është i pakuptueshëm dhe do të jetë i papërballueshëm për një pjesë të konsiderueshme të qytetarëve. ZRRE-ja do të bënte shumë mirë që të paktën për këtë kohë do e merrte këtë vendim mirëpo mbetet në përgjegjësinë e saj nëse dëshiron t’i dëgjoj qytetarët dhe ta mbroj interesin e tyre or të cilin në fakt edhe është aty”, ka shtuar ai.
Ndryshe, të shtunën e kaluar më 5 prill është protestuar në Prishtinë, ku u kërkua që të mos merret vendimi për shtrenjtimin e energjisë elektrike. Kjo ishte protesta e parë që u thirr nga iniciativa “Asnjë cent më shumë”.
Zyra e Rregullatorit për Energji ka njoftuar se të premten me fillim prej orës 10:00 Bordi i Zyrës së Rregullatorit për Energji do të mbajë seancën e tretë sivjet në të cilën pritet të vendoset për propozimin për shtrenjtim të çmimit të energjisë elektrike për 15 për qind./teve1.info/
