Ish i burgosuri në kohën e luftës në Burgun e Dubravë, Skënder Rracaj ka dhënë një dëshmi tronditëse të enjten, në Gjykatën Themelore të Prishtinës.
Rracaj ka rrëfyer rrahjet dhe maltretimet që gardianët serbë ua bënin të burgosurve shqiptar.
Asokohe, mizoritë shkuan aq larg, saqë Rracaj tregon se gardianët i detyruan që t’i ngarkonin në kamionë shokët e tyre, të cilët ishin vrarë në burg.
Për disa nga këto krime, Rracaj po e drejton gishtin kah Gavrilo Milosavleviq, i cili në atë kohë kishte qenë guardian në burgun e Dubravës.
“Arsyeje s’ka pasë kurgjo. Për ta arsye ka qenë veç me rrehë, me maltretu, diçka tjetër s’ka pasë”, ka deklaruar ai.
Për këto keqtrajtime, Rracaj tregoi se u kishin treguar edhe ndërkombëtarëve që shkonin për t’i vizituar.
Mirëpo, kjo u sillte atyre pasoja.
“Na kanë rreh, na kanë thanë pse po ankoheni. Na s’mujmë me j’u majt k’tu qysh po lypni ju”, tha ai.
Me të njëjtat sjellje, Rracaj dhe të burgosurit e tjerë ishin përballur për tre vite rresht.
“Na s’kemi kërku asgjë pos çka i takon një të burgosuri si e drejtë e tij, por na atë të drejtë s’e kemi pasë. Atë s’e kemi g’zu kurrë, për tre vite rresht.”
Para trupit gjykues, shkurtimisht dëshmoi edhe një ish-koleg i të akuzuarit.
Bajram Behluli tregoi se Milosavleviqin e ka takuar në disa raste gjatë pauzave.
“Të akuzuarin, s’muj me thanë që s’e kom pa kur kemi dalë në pauzë me hangër bukë. Këta, stafi civil kanë dalë ma herët”, tha Behluli.
“Sa kam punu prej 88-94, në pranim kur kanë ardhë të burgosurit e kam pa me një aparat në dorë, tu hy në pavijon me i fotografu të burgosurit.”
Gavrilo Milosavleviq është arrestuar në dhjetor të vitit 2022, dhe Prokuroria po e akuzon atë edhe për vrasjen masive të të burgosurve në burgun e Dubravës.
