Kryeministri në detyrë, Albin Kurti ka përkujtuar 28 dëshmorët dhe 32 martirët në 26-vjetorin e rënies në Kaçanik.
Kurti tha se muaji prill është muaj i përkujtimeve të viktimave të masakrave, të krimit e gjenocideve të kryera nga Serbia.
“Jemi në prill, në muajin e përkujtimeve të viktimave të masakrave, të krimit e gjenocideve të kryera nga Serbia në Kosovë. Kujtojmë me nderim dhe dhimbje civilët dhe të zhdukurit me dhunë gjatë javës së parë të prillit 1999 në Rezallë të Drenicës, në Lubeniq të Pejës, në Gjakovë, Fushë-Kosovë, Suharekë, në masakrën e tmerrshme të dy familjeve në Gjakovë, në Gjilan, Vushtrri, Istog, në Popovë të Podujevës, Polac e në fshatra të Pejës”, tha ai, shkruan teve1.info
Kurti tha se LVV-ja ka ngritur në nivel drejtorie 41 zyrtarë hetues nga 19 sosh sa kanë qenë për hetimet e krimeve të kryera gjatë luftës së fundit në Kosovë.
“Për adresimin e krimeve të kryera gjatë luftës kemi zhvilluar bazën ligjore të munguar për shumë vite dhe kemi rritur kapacitetet e institucioneve për adresimin efikas të tyre. Për hetimin dhe të vërtetën me strukturën e re të miratuar të Policisë së Kosovës, hetimet për krimet e luftës i kemi ngritur në nivel drejtorie me 41 zyrtarë hetues nga 19 sosh sa ishin më herët. Me rritjen e numrit të hetuesve po rritet edhe numri i dëshmitarëve të intervistuar për krimet e luftës. Në shërbim të drejtësisë për këto krime, kemi bërë ndryshime të nevojshme ligjore që mundësojnë gjykimin në mungesë të kriminelëve serbë të luftës”, deklaroi kryeministri në detyrë.
Ai tha se nga viti 2021, Departamenti për Hetimin e Krimeve të Luftës ka rritur numrin e aktakuzave të ngritura. Ndërsa, në vitin 2023 tha se janë ngritur 15 aktakuza për krime lufte e janë akuzuar 60 persona./teve1.info/
