Të dielën në Prizren janë ndaluar 12 persona, shtetas të Serbisë si pjesë e grupit të arrestuarave në Gjakovë një ditë më parë, ku ata ishin kamufluar si “pelegrinë” në mesin e tyre kishte edhe pjesëtarë të ushtrisë dhe policisë serbe.
Lajmin e ka bërë të ditur ministri në deteyrë i Punëve të Brendshme, Xhelal Sveçla i cili tha se të arrestuarit në Prizren po strehoheshin në Seminarin Ortodoks të Bogosllavisë.
Ai ka thënë se në mesin ishin dy oficerë aktivë të shërbimeve të sigurisë serbe.
“Grupi i dytë, me 12 persona, është ndaluar në Prizren, teksa po strehoheshin në Seminarin Ortodoks të Bogosllavisë. Edhe në këtë grup ishin dy oficerë aktivë të shërbimeve të sigurisë serbe.Hetimet paraprake kanë konfirmuar se një zyrtar i policisë serbe me gradë të togerit policor, ka lidhje të afërta familjare me anëtarin e grupit terrorist të Banjskës, Nemanja Radivojevic, nofka “Gandi”. Ky i fundit është i afërt i Vladimir Radivojevic, nofka “Mami”, i cili është i dyshuari kryesor për vrasjen e rreshterit policor të Kosovës, Afrim Bunjaku. Zyrtari tjetër ushtarak, i cili bartë gradën e kapitenit të klasit të parë, është lidhje e ish-gjeneralit të inteligjencës ushtarake serbe, Jovan Milanovic, i njohur për përfshirjen në rrjedhjen e të dhënave të NATO-s para bombardimeve mbi caqet serbe”, ka shkruar Sveçla në Facebook.
Ai ka thënë se strehimi në këtë objekt lë dyshime se përdorim të objekteve fetare për kamuflim ose shkaktim të tensionëve.
“Fakti që u strehuan në Seminarin Ortodoks të Bogosllavisë mund të tregojë për një tentativë për të shfrytëzuar institucione fetare për kamuflim ose për të shkaktuar tensione ndëretnike/fetare në Kosovë, duke përdorur ngjarje të sajuara për të nxitur reagime të dhunshme ose trazira”.
Ai ka thënë se organet e sigurisë do të vazhdojnë hetimet dhe do të informojnë opinionin publik për zhvillimet e mëtejshme.
Ekskluzive, këta janë katër serbët e arrestuar të kamufluar si “pelegrinë”
