Kryeministri në detyrë, Albin Kurti të mërkurën është takuar me kryetarin e partisë Iniciativa e Re Demokratike e Kosovës (IRDK), Elbert Krasniqi.
Sipas Zyrës së Kryeministrit ky takim ishte pjesë e konsultimeve të cilat po zhvillohen nga kryeministri me partitë politike të pakicave.
Në komunikatë po ashtu thuhet se Krasniqi i ka dhënë mbështetje Kurtit në formimin e qeverisë së re.
“Gjatë ditës së sotme, Kryeministri i Republikës së Kosovës, Albin Kurti, bashkë me zëvendëskryeministrin e parë për Integrim Evropian, Zhvillim dhe Dialog të Republikës së Kosovës, Besnik Bislimi, priti në takim ministrin e Administrimit të Pushtetit Lokal dhe kryetarin e partisë Iniciativa e Re Demokratike e Kosovës (IRDK), Elbert Krasniqi, ku diskutuan mbi formimin e qeverisë së re pas certifikimit të rezultatit të zgjedhjeve të 9 shkurtit, ku Lëvizja VETËVENDOSJE! doli fituese. Ky takim ishte pjesë e konsultimeve të cilat po zhvillohen nga kryeministri me partitë politike të pakicave. Prezent në takim ishte dhe deputeti e anëtari i partisë IRDK, Fridon Lala. Kryeministri Kurti e falënderoi z. Krasniqi për bashkëpunimin e ngushtë gjatë këtij mandati qeveritar dhe punën e zhvilluar. Nga ana e tij, kryetari i IRDK-së Elbert Krasniqi konfirmoi gatishmërinë e plotë për vazhdimin e këtij bashkëpunimi të frytshëm si dhe mbështetjen ndaj kryeministrit Kurti në formimin e qeverisë së re”, bëhet e ditur në komunikatë.
Ndryshe, kryeministri në detyrë i Kosovës, Albin Kurti, të mërkurën ka njoftuar se ka nisur takimet konsultative me partitë politike të pakicave për formimin e qeverisë së re, pas certifikimit të rezultateve të zgjedhjeve të 9 shkurtit.
Ai gjatë ditës është takuar edhe me kryetaren e Partisë së Re Demokratike, Emilija Rexhepi, si dhe me kryetarin e Partisë për Liri, Drejtësi dhe Mbijetesë, Nenad Rashiq./teve1.info/
