Diplomati, Donat Syla mendon se target i Lëvizjes Vetëvendosje për formimin e qeverisë së re do të jenë deputetë nga Lidhja Demokratike e Kosovës.
Sipas tij është interes i jashtëzakonshëm i LVV-së që ta ketë në krahun e saj LDK-në për faktin se siç ka thënë ai elektorati i tyre është kryesisht i njëjtë.
Ndërkaq, Nisma Socialdemokrate sipas Syles është opsioni i dytë i LVV-së në rast se nuk mund ta arrijë objektivin e saj me LDK-në.
“Unë mendoj që target kryesor i Lëvizjes Vetëvendosje do të jetë Lidhja Demokratike e Kosovës ose deputet të saj. Unë e kam thënë disa herë dhe në perspektivë shikohet si një veprim jashtëzakonisht i mirë i LVV-së që në krahun e saj ta ketë një Lidhje Demokratike të dobët duke e marrë në sqetullën e saj dhe për të ardhmen për të korrur një rezultat bukur të thellë kurdo që mbahen zgjedhjet ardhshme parlamentare. Mirëpo në rast se këtë objektiv nuk mund ta arrijë atëherë si opsion të dytë do ta ketë Nismën Socialdemokrate e cila për më tepër është partia e cila është në kuadër të Kuvendit të Kosovës me më së paku deputet dhe nëse eventualisht kemi zgjedhje të jashtëzakonshme ajo rrezikon të mos e kaloj pragun nëse nuk është pjesë e një koalicioni parazgjedhor”, ka thënë ai në emisionin “Info Nata” në Tëvë1.
