Analisti, Xhevdet Pozhari e vlerëson të habitshëm faktin që pretendimet për manipulim të votave brenda LDK-së i kanë parë të gjithë përveç Gjykatës Supreme.
Pozhari ka thënë se pretendimet kanë qenë publike dhe ka pasur gjetje nga më të ndryshmet por që sipas tij Supremja nuk ka dashur ti shoh.
“Për mua ky është problemi sepse diçka që e kanë parë të gjithë, edhe oponentët politik të LDK-së edhe njerëzit brenda kryesisë së LDK-së nuk e ka parë Gjykata Supreme. Për diçka që në komunikime thuhet se edhe fëmijët po e kuptojnë këtë skemë të organizuar kriminale ata nuk e shohin. Pretendimet kanë qenë publike, ai dokument ka qenë i ndërtuar dhe i publikuar dhe ka pasur gjetje nga më të ndryshmet të cilat nuk ka dashur t’i shoh Gjykata Supreme dhe rasti rrjedhimisht ka kaluar në Gjykatën Kushtetuese”, ka thënë ai në emisionin “Këndi i Debatit” në Tëvë1.
Të hënën në media u publikuan disa mesazhe të brendshme të LDK-së, të shkëmbyera në një grup “Viber” të anëtarëve të LDK-së, të cilat zbulojnë shqetësime për manipulime gjatë procesit zgjedhor.
Sipas ‘screenshot’-eve të publikuara, ish-shefi i grupit parlamentar të LDK-së, Arben Gashi, akuzon për vjedhje votash dhe kërkon që ky rast të cilësohet si “skemë kriminale”.
