Copëzat e automjetit kane mbetur ende në rrugën magjistrale Prishtinë-Pejë.
E këto janë vetëm disa nga mbetjet e aksidentit fatal që ndodhi të dielën mbrëma në fshatin Bresje në Fushë- Kosovë.
Një veturë goditi për vdekje një këmbësor.
Ku si pasojë e plagëve të marra i aksidentuar ndërroi jetë në vendin e ngjarjes.
Rastin për televizionin e ka bërë të ditur Daut Hoxha, zëdhënësi i Policisë së Kosovës.
“Më datën 30.03.2025, rreth orës 21:00 në rrugën Prishtinë – Pejë, te semaforët në fshatin Bresje është shkaktuar një aksident trafiku mes një veture dhe një këmbësori. Në vendin e ngjarjes kanë dalë njësitet policore dhe autoambulanca, ku mjeku kujdestar ka konstatuar vdekjen e një personi (M/K)”, është thënë nga policia.
Policia e Kosovës lidhur më këtë aksident ka arrestuar një person, ku po të njëjtin e ka dërguar në mbajtje.
“Është arrestuar vozitësi mashkull kosovar, pasi që dyshohet se me veturë ka goditur këmbësorin mashkull kosovar, ku si pasojë viktima ka vdekur në vendin e ngjarjes”, ka bërë të ditur policia.
E se kujdes të shtuar duhet të kenë vozitësit sidomos në raste festash e thotë njohësi i komunikacionit Nol Dedaj.
“Zakonisht kur kemi festa ose organizime, tubime drejtuesit e automjetit duhet me pas kujdesin e shtuar sidomos edhe tani kujdesin e shtuar për shkak se jemi në mbarim të sezonës dimërore dhe fillimi i pranverës është mos me na ndodh që faktori rrugë të jetë ose edhe faktorët e tjerë të cilët janë shumë aktiv të shkaktarët e aksidenteve mos të ndodhin, por ajo se çka është më kryesorja le ta zhvillojnë shpejtësinë e boshteve- kushteve të krijuara”, ka thënë Dedaj.
Burri i moshës rreth 60 vjeçare u varros sot në Podujevë.
Në mbarë Kosovën në 24 orët e fundit janë shënuar 27 aksidente trafiku me dëme material e janë shqiptuar 784 gjoba.
